‘चतुःशृंगी’ची तयारी अंतिम टप्प्यात

पुणे । चतुःशृंगी देवीच्या शारदीय नवरात्रौत्सवाची तयारी अंतिम टप्प्यात आली असून यावर्षीचा नवरात्रौत्सव गुरुवारी (दि.21) सुरू होणार आहे. मंदिरात सकाळी 9 वाजता घटस्थापना करण्यात येणार आहे.

सकाळी 6पासून अभिषेक, रुद्राभिषेक, महापूजा, महावस्त्र अर्पण करणे हे धार्मिक विधी होणार आहेत. या वर्षीचे सालकरी रवींद्र अनगळ असून नारायण कानडे गुरुजी पौरोहित्य करणार असल्याची माहिती मंदिर ट्रस्टचे अध्यक्ष प्राचार्य डॉ. गंगाधर अनगळ यांनी पत्रकार परिषदेत दिली. कार्यकारी विश्‍वस्त सुहास अनगळ, सुहास प्रभाकर अनगळ, नरेंद्र अनगळ, श्रीरंग अनगळ उपस्थित होते.

150 स्वयंसेवक व 20 सीसीटीव्ही
व्यवस्थापन सहाय्यासाठी अनिरुद्ध सेवा केंद्राचे 150 स्वयंसेवक मदत करणार असून, सुरक्षितेसाठी 20 सीसीटीव्ही कॅमेरे बसविण्यात आले आहेत. महापालिकेतर्फे किटकनाशकांचीफवारणी, कचरा उचलण्यासाठी जादा कंटेनर, पाणी निर्जंतुकीकरण करणे, ग्रीन हिल्स गु्रपच्या सहकार्याने निर्माल्याचे खत निर्माण करण्याचा प्रकल्प उभारण्यात येणार आहे. सुयोग मित्र मंडळाच्या वतीने तातडीचे वैद्यकीय मदत केंद्र व रुग्णवाहिकेची व्यवस्था करण्यात आली असून, अग्निशामक दलाची गाडी 24 तास उपलब्ध होणार आहे. पॉलिटेक्निक महाविद्यालयाच्या मैदानावर विनामूल्य पार्किंगची सुविधा देण्यात येणार आहे. दर्शन घेऊन भाविकांना लवकरात लवकर बाहेर पडता यावे यासाठी बॅरिगेटसची व्यवस्था करण्यात आली आहे.

मंदिर परिसराचा 2 कोटींचा विमा
मंदिर परिसरात रंगरंगोटीची कामे करण्यात आली असून, मंदिरावर विद्युत रोषणाई, वीज गेल्यास जनरेटरची सोय करण्यात आली आहे. सर्व भाविकांना यात्रेसह संपूर्ण वर्षाचा मंदिराच्या परिसरात 2 कोटी रुपयांचा विमा उतरवण्यात आला आहे. रांगेत उभे राहाणार्‍या भाविकांसाठी पिण्याच्या पाण्याची विनामूल्य व्यवस्था करण्यात आली आहे.

आजीबाईंचा भोंडला
उत्सव काळात मंदिर 24 तास खुले राहणार आहे. गणपती मंदिरात रोज दुपारी सहा भजने होणार आहेत. शनिवारी (दि.24) दुपारी चार वाजता सुयोग मित्र मंडळाच्या वतीने वृद्धाश्रमातील महिलांसाठी आजीबाईंचा भोंडला होणार आहे.े शुक्रवारी (दि.29) रात्री आठपासून नवचंडी होम होणार आहे. शनिवारी (दि.30) विजयादशमीनिमित्त सायंकाळी 5पासून सीमोल्लंघनाची मिरवणूक मंदिरापासून सावित्रीबाई फुले पुणे विद्यापीठाच्या प्रवेशद्वारापर्यंत काढण्यात येणार आहे. बँड, ढोल, लेझीम, नगारा, चौघडा, भुते, वाघ्या, मुरळी, देवीचे सेवेकरी यांचा मिरवणुकीत समावेश असून, हेलिकॉप्टरमधून देवीच्या पालखीवर पुष्पवृष्टी करण्यात येणार आहे.