चांगल्या आरोग्यसेवेसाठी सुसंवाद महत्त्वाचा

पुणे । चांगल्या आणि सुरक्षित आरोग्य सेवेसाठी रुग्ण व त्यांचे नातेवाईक, स्थानिक पोलिस, वकील यांच्याशी डॉक्टर, रुग्णालय व्यवस्थापनाने सुसंवाद ठेवणे महत्वाचे आहे. त्याचबरोबर रुग्णाचे दस्तावेज आणि सर्व आवश्यक कागदपत्रांच्या नोंदी असतील, तर पोलिसांपासून तुम्हाला संरक्षण मिळू शकते आणि तुम्ही अधिक सक्षम आरोग्य सेवा पुरवू शकता, असे प्रतिपादन मुंबई येथील सामाजिक व पोलिस कार्यकर्ते आणि स्त्री रोगतज्ज्ञ डॉ. विपीन चेकर यांनी केले.

डॉ. विश्‍वनाथ कोल्हे यांना जीवनगौरव
जीआरडी इन्फ्रा संस्थेने प्रायोजित केलेल्या या परिषदेमध्ये हेल्थकेअर, मेडिको लीगल, मार्केटिंग इन हेल्थकेअर, आरोग्यसेवेत आयटीची भूमिका आदी विषयांवर परिसंवाद झाले. यावेळी डॉ. विश्‍वनाथ कोल्हे यांना जीवनगौरव पुरस्कार (लाईफ टाईम एचिव्हमेंट) देऊन सन्मानित करण्यात आले. तर डॉ. सुभाष चौधरी यांना हेल्थकेअर आयकॉन आणि डॉ. उल्हास पाटील यांना व्हर्सटाईल पर्सोनेलिटी ऑफ हेल्थकेअर पुरस्कार प्रदान करण्यात आला.

तंत्रज्ञामुळे उपचारपद्धती झाली सोपी
रुग्णालय व्यवस्थापन, डॉक्टर आणि रुग्ण या तीनही घटकांसाठी माहिती तंत्रज्ञान अतिशय उपयुक्त आहे. आरोग्यसेवा क्षेत्र वाढीबरोबरच अलीकडे स्वयंचलन (अ‍ॅटोमेशन) महत्त्वाचे ठरत आहे. वेगवेगळी अ‍ॅप्लिकेशन्स, वेअरेबल डिव्हाईस आणि तंत्रज्ञान यामुळे उपचार पद्धती अधिक सोप्या होत आहेत. औषधांच्या वेळा, व्यायाम, ग्रामीण भागातील रुग्णांना अत्याधुनिक आरोग्यसेवा याची माहिती पुरविण्यासाठी तंत्रज्ञान उपयुक्त ठरत आहे. आर्टिफिशियल इंटेलिजन्समुळे येत्या काळात आरोग्य क्षेत्र आणखी अत्याधुनिक होईल, असे सीड इन्फोटेकचे संचालक नरेंद्र बर्‍हाटे यांनी सांगितले.

अर्थकारणावर मार्गदर्शन
डॉ. सुधीर राय यांनी अर्थकारण, आनंद माहूरकर यांनी ब्रँड विकसन यावर मार्गदर्शन केले. चेअरमन रवींद्र चौधरी यांनी एलसीसीआयबद्दल माहिती दिली. सचिव डॉ. राहुल चौधरी यांनी एलसीसीआयएच्या भविष्यकालीन योजनांबद्दल माहिती दिली. डॉ. सुरेंद्र पाटील यांनी प्रास्ताविक केले. डॉ. रत्नप्रभा चौधरी, पूनम यादव यांनी सूत्रसंचालन तर डॉ. महेंद्र ठोंबरे यांनी आभार मानले.

पोलिसांसमोर धैर्याने जा
एखाद्या प्रकरणात पोलिसांचा फोन आल्यास आपण घाबरून जातो. मात्र, स्थानिक पोलिसांशी आपले चांगले संबंध असतील आणि कागदपत्रे व्यवस्थित असतील, तर घाबरण्याचे कारण नाही. पोलिसांना धैर्याने सामोरे जावे. वकिलांमार्फत जामीन मिळविण्याचा प्रयत्न करावा. कठिण प्रसंग उद्भवला तर कुटुंबीयांना माहिती असावी, असे डॉ. चेकर यांनी यावेळी सांगितले.

‘पोलिसांच्या फोननंतर पुढे काय?’
लेवा चेंबर ऑफ कॉमर्स, इंडस्ट्रीज अँड अ‍ॅग्रीकल्चर (एलसीसीआयए) तर्फे पुण्यातील हॉटेल जेडब्ल्यू मेरियट येथे आयोजित हेल्थकेअरवर परिषदेच्या उद्घाटनप्रसंगी डॉ. विपीन चेकर बोलत होते. ‘पोलिसांच्या फोननंतर पुढे काय?’ या विषयावर त्यांनी मार्गदर्शन केले. यावेळी डॉ. विश्‍वनाथ कोल्हे, डॉ. सुभाष चौधरी, डॉ. उल्हास पाटील हे प्रमुख पाहुणे म्हणून उपस्थित होते. एलसीसीआयए कोअर कमिटीचे अध्यक्ष रविंद्र चौधरी, दै. जनशक्तिचे मुख्य संपादक कुंदन ढाके, मिलिंद चौधरी, वासू पाटील, गौरव अतरदे, प्रशांत चौधरी, डॉ. पवन भोळे, एलसीसीआयए हेल्थकेअरचे अध्यक्ष डॉ. सुरेंद्र पाटील, सहअध्यक्ष डॉ. संदीप भिरूड, सचिव डॉ. राहुल चौधरी, सहसचिव डॉ. विवेक नेमाडे, कोषाध्यक्ष डॉ. भूषण जावळे, सहकोषाध्यक्ष स्वप्नील भोळे, आयोजक प्रमुख डॉ. रत्नप्रभा चौधरी यांच्यासह इतर मान्यवर याप्रसंगी उपस्थित होते.