चांदीचे सिंहासन नको, तर सत्ता हवी! – राज ठाकरे

मुंबई । शिवसेनाप्रमुख बाळासाहेब ठाकरे यांना चांदीचे सिंहासन देत एका सच्च्या शिवसैनिकाने त्यांच्याप्रती आपली कृतज्ञता दाखवून दिली होती. अगदी त्याचप्रमाणे एका मनसैनिकाने मनसे अध्यक्ष राज ठाकरे यांच्यासाठी चांदीचे सिंहासन बनवून शिवाजी पार्क येथील कुष्णकुंज निवासस्थानी आणले. याबाबत अनिभिज्ञ असलेल्या राज यांनी हे सिंहासन स्वीकारलं नसले तरी सिंहासनाची पाहणी करून त्यावर आपली खास स्वाक्षरी देत मनसैनिकाला खूश केले. पुण्यातील विधाते कुटुंब मनसे अध्यक्ष राज ठाकरे यांचे निस्सीम चाहते आहेत. आपले प्रेम व्यक्त करण्यासाठी त्यांनी राज ठाकरेंसाठी चक्क एक चांदीचे सिंहासन तयार करून घेतले. हे सिंहासन घेऊन विधाते कुटुंब सकाळी कृष्णकुंजवर धडकले. ही माहिती राज यांच्यापर्यंत पोहोचल्यावर त्यांनी हे सिंहासन घेण्यास नम्रपणे नकार दर्शवला.

बाळासाहेब ठाकरे यांच्याप्रमाणेच राज ठाकरे यांनीही सिंहासनावर बसून पक्ष चालवावा ही त्यांच्या चाहत्यांची इच्छा होती. ही पूर्ण होऊ शकली नाही. पण, महाराष्ट्राचा पुढचा मुख्यमंत्री मनसेचाच होणार आणि नक्की होणार! असा अभिप्राय आपल्या स्वाक्षरीसह देत राज ठाकरे यांनी आपल्या या चाहत्यांना खूश केले. योगायोग असा की शुक्रवारी विश्‍वसुंदरीच्या सदिच्छा भेटीनिम्मित्तान हिरेजडित मुकुट ’कृष्णकुंज’वर आला होता. त्या त्यापाठोपाठ शनिवारी सिंहासनही आलं. शिवसेनाप्रमुख बाळासाहेब ठाकरे यांना देण्यात आलेल्या सिंहासनावरून वाद निर्माण झाल्यानंतर त्यांनी या सिंहासनाचा त्याग केला होता. त्यानंतर ते लाकडी सिंहासन वापरू लागले होते. असा कुठलाही वाद आपल्या बाबतीत उद्धवू नये, याची दक्षता घेत राज यांनी या चांदीच्या सिंहासनाचा स्वीकार केला नसेल, असा कयास बांधला जात आहे.