चाकणमध्ये सराफी दुकान फोडले; 28 लाखांचा ऐवज लंपास

चाकण : चाकणमधील एका सराफी दुकानाचे शटर उचकटून तब्बल 28 लाख रुपये किमतीचे सोन्या-चांदीचे दागिने चोरट्यांनी लांबविल्याची घटना चाकण (ता. खेड) येथे शुक्रवारी (दि. 18) पहाटे पावणे चार वाजण्याच्या सुमारास घडली. शहराच्या मध्यभागात असलेल्या भांबुर्डेकर सराफी दुकानातील या घरफोडी प्रकरणी पाच अज्ञात चोरट्यांवर गुन्हा दाखल केला आहे. या घटनेत रोख रकमेसह सोन्याची ठुशी, सोन्याची बोरमाळ, पैंजण, जोडवे, देवांच्या मुर्त्या, अंगठ्या, ब्रासलेट आदी महागडे दागिने असा एकुण 28 लाख 15 हजार रुपये किमतीचा ऐवज लंपास करण्यात आला आहे. याबाबत भांबुर्डेकर सराफ दुकानच्यावतीने चाकण पोलीस ठाण्यात फिर्याद देण्यात आली आहे. त्यांच्या फिर्यादीवरून येथील पोलिसांनी एकुण पाच अनोळखी इसमाविरुद्ध गुन्हा दाखल केला आहे.

चाकण पोलिसांनी दिलेली माहिती अशी, जुन्या पुणे-नाशिक महामार्गावरील चाकण गावच्या हद्दीतील माणिक चौकाजवळ भांबुर्डेकर यांचे अद्ययावत असे सोन्या-चांदीचे दुकान आहे. शुक्रवारी (दि. 18) पहाटे पावणे चार वाजण्याच्या दरम्यान पाच अनोळखी इसमांनी भांबुर्डेकर यांचे सोन्या-चांदीचे दुकान फोडले. तत्पूर्वी त्यांनी दुकानाचे सायरन, दर्शनी भागात असलेले सीसीटीव्ही बंद केले. सबंधित तरुण हे 25 ते 30 वर्षे वयोगटातील असून, त्यांच्या अंगात जर्किन, डोक्यात कानटोपी, चेहरा झाकलेला, पायात बूट आणि हातात मौजे घातलेले असल्याचे एका सीसीटीव्हीमध्ये आलेल्या छबीत स्पष्ट झाले आहे. भांबुर्डेकर सराफाच्या दुकानाचे लॉक तोडून शटर उचकटून दुकानात प्रवेश केला. त्यानंतर अत्यंत सफाईदारपणे कुणाला काहीही समजण्यापूर्वी चोरट्यांनी सोन्याची ठुशी, वेगवेगळ्या आकाराचे आणि डिझाईनचे सोने, भरीव बोरमाळ, पैंजण, जोडवी, गणपती, काळूबाई, लक्ष्मी यांच्या चांदीच्या मूर्ती, अंगठ्या, ब्रेसलेट, चांदीच्या चैनी, छल्ले आणि चांदीचा मेखला, तोडे, वाळे असा एकुण 28 लाख 15 हजार रूपपे किमतीचा ऐवज घेवून पोबारा केला.

चाकण पोलीस ठाण्याचे पोलीस निरीक्षक सुनील पवार यांनी सांगितले की, चोरट्यांनी सीसीटीव्ही आणि सायरन बंद करून हा प्रकार केला आहे. एका सीसीटीव्हीमध्ये पाच असल्याचे दिसून येत आहे. घटनास्थळी श्‍वा न पथक आणि ठसे तज्ज्ञांना पाचारण करण्यात आले होते. चोरट्यांनी शटर तोडण्याचे कटर आणि सर्व वस्तू जाताना नेल्याने श्‍वान पथक मग काढू शकले नाही. पोलिसांनी एक पथक तपासासाठी रवाना केले असून तपास सुरु आहे. चाकण पोलिसांनी याप्रकरणी पाच ते सहा अज्ञात चोरट्यांवर भा.द.वि.कलम अन्वये गुन्हा दाखल केला आहे. या धाडसीचोरीमुळे चाकण शहर व परिसरात प्रचंड खळबळ उडाली आहे. चोरी झालेल्या सराफी दुकानाच्या लगत अनेक सराफी दुकाने असून रात्रीच्या वेळी सुरक्षा वार्‍यावर असल्याचे या धाडसी चोरीने स्पष्ट झाले आहे.