चाकूच्या धाकावर लूटले ; दोघे आरोपी गजाआड

भुसावळ:- कमिशन तत्वावर तेल, साबल, गुलाबजल विक्री करणार्‍या सेल्समनला चाकूचा धाक दाखवत दुचाकीवरून आलेल्या तिघांनी लुटल्याची घटना 12 मार्च रोजी दुपारी चार वाजता जामनेर रोडवरील साईबाबा मंदिरामागील डॉ.आंबेडकर हॉस्टेलमागे घडली होती. या प्रकरणी सुरुवातीला सिकंदर जाफर गवळी (मच्छीवाडा, जाम मोहल्ला, भुसावळ) यास अटक करण्यात आल्यानंतर त्याची न्यायालयीन कोठडीत रवानगी करण्यात आली. आरोपीचे पसार असलेले साथीदार व शार्प शुटर जय मुकेश ठाकूर (20, वाल्मीक नगर, भुसावळ) व बेग आशिक उर्फ बाबा काल्या बेग असलम (22, ईदगाह जवळ, खडका रोड, भुसावळ) यांना अटक करण्यात आली. आरोपींच्या ताब्यातून सहा मोबाईल, चार हजारांची रोकड व  धारदार चाकू जप्त करण्यात आला.

तिघा आरोपींनी आठ हजार 100 रुपयांच्या रोकडसह 37 हजार 600 रुपये किंमतीचे सहा मोबाईल लांबवले होत तर  या प्रकरणी परमेश्‍वर भिकन भालेराव (वाडी बु.॥, ता.भोकरदन, जि.जालना, ह.मु.श्रद्धा नगर, मिलिंद चौधरी यांच्या घरात, भुसावळ) यांच्या तक्रारीनुसार गुन्हा दाखल करण्यात आला होता. फिर्यादी हे दिल्लीच्या ग्लेझी ट्रेडींग इंडिया प्रा.लि.या कंपनीत सेल्समन असून त्यांच्यासह सहकारी गणेश पवार, दत्ता आखरे, कृष्णा कालगुडे, नवनाथ बोबडे हे साहित्य विकून घराकडे येत असताना दुचाकीवरून आलेल्या तिघांनी त्यांना चाकूचा धाक दाखवत धमकावले व त्यांच्याकडील मोबाईल व रोकड काढून पोबारा केला होता. आरोपींपैकी एकाने नाईट पँट, अंगात करडा शर्ट तर दुसर्‍याने  काळ्या रंगाची पँट तसेच काळ्या-सावळ्या रंगाचा शर्ट घातला होता तर 23 ते 27 त्यांचा वयोगट असल्याचे वर्णन सांगितल्याने वर्णनावरून आरोपींचा छडा लागला.

सहाय्यक पोलीस अधीक्षक नीलोत्पल, बाजारपेठ निरीक्षक चंद्रकांत सरोदे यांच्या मार्गदर्शनाखाली एएसआय आनंदसिंग पाटील, विकास सातदिवे, तस्लीम पठाण आदींनी आरोपींच्या मुसक्या आवळल्या.