चिंचवडला शुक्रवारी, शनिवारी अ. भा. तिसरे मराठी लोककला संमेलन

पिंपरी-चिंचवड : अखिल भारतीय तिसरे मराठी लोककला संमेलन चिंचवड येथे 13 व 14 एप्रिलला होत आहे. या संमेलनात शोभायात्रा, लोककलांचा अविष्कार, परिसंवाद आणि पठठे बापूरावांचे स्मरण असे विविध कार्यक्रम होणार आहेत. संमेलनस्थळाला शाहीर पठ्ठे बापूराव नगरी असे नाव देण्यात येणार आहे, अशी माहिती अखिल भारतीय मराठी लोलकला संमेलनाचे स्वागताध्यक्ष भाऊसाहेब भोईर यांनी आज पत्रकार परिषदेत दिली.

चिंचवड येथील प्रा. रामकृष्ण मोरे प्रेक्षागृहात होणार्‍या या संमेलनात लोककलांचा आविष्कार, विविध विषयांवर परिसंवाद आणि लोकशाहीर पठ्ठे बापूराव यांचे स्मरण करणारे कार्यक्रम, महाराष्ट्राची लोकधारा असे आकर्षण या संमेलनात असणार आहे. दि. 13 एप्रिलला सकाळी साडेआठ वाजता संमेलनाची सुरुवात शोभायात्रेने होणार आहे. चिंचवड येथील मोरया गोसावी समाधी मंदिरापासून ते प्रा. रामकृष्ण मोरे प्रेक्षागृहापर्यंत ही शोभायात्रा काढण्यात येणार आहे.

उद्घाटक राज्यपाल श्रीनिवास पाटील
या संमेलनाचे उदघाटन सिक्कीमचे राज्यपाल श्रीनिवास पाटील यांच्या हस्ते करण्यात येणार आहे. यावेळी पालकमंत्री गिरीश बापट, राष्ट्रवादी काँग्रेसचे प्रदेशाध्यक्ष सुनील तटकरे, आयुक्त श्रावण हर्डीकर आदी उपस्थित राहणार आहेत. संमेलनाच्या अध्यक्षस्थानी डॉ. रामचंद्र देखणे असणार आहे. उदघाटन सोहळ्यात लोककलेत योगदान देणा-या व्यक्तींचा गौरव करण्यात येणार आहे, जीवनगौरव पुरस्कार प्रसिध्द लावणी कलावंत आणि चित्रपट अभिनेत्री लीला गांधी यांना तसेच प्रसिध्द लेखक प्रभाकर मांडे यांना कलागौरव पुरस्काराने गौरविण्यात येणार आहे. लोककला क्षेत्रातील कलावंताना वसंत अवसरीकर (सोंगाड्या), मुरलीधर सुपेकर (शाहीर), संजीवनी मुळे नगरकर (लोकनाट्य), प्रतिक लोखंडे (युवा शाहीर), सोपान खुडे (साहित्य), पुरुषोत्तम महाराज पाटील (कीर्तन), बापूराव भोसले (गोंधळी) यांचा समावेश आहे.

‘पंचरंगी पठ्ठे बापूराव’
त्यानंतर दुपारी दोन ते चार या वेळेत संत कवियित्री अभिव्यक्ती आणि लोकवाणी या विषयावर परिसंवाद होणार आहे. त्यामध्ये डॉ. विद्याधर पाटगणकर, प्रमोद जगताप, डॉ. सिसिलीयो कार्व्हालो, डॉ. लीला गोविलीकर, विद्याधर जिंतीकर आदी सहभागी असणार आहेत. तर स्थानिक कलावंताचा आविष्कार संध्याकाळी चार ते सहा या वेळेत होणार आहे. लोकरंग प्रस्तुत पंचरंगी पट्ठे बापूराव असा मानवंदनापर पठ्ठे बापूरावांना हा कार्यक्रम होणार आहे. त्याचे संकल्पना लेखन डॉ. प्रकाश खांडगे यांचे असून दिग्दर्शन प्रा. डॉ. गणेश चंदनशिवे, शैला खांडगे, योगेश चिकटगावकर, विकास कोकाटे यांचे आहे. त्यात शकुंतला नगरकर, प्रमिला लोदगेकर, पोर्णिमा नगरकर, प्रा. डॉ. गणेश चंदनशिवे, योगेश चिकटगावकर, ओतबर शिरढोणकर, सुभाष खरोटे, विकास कोकाटे, प्राजक्ता महामुनी आणि आदी माजी विद्यार्थी सहभागी होणार आहे.

शनिवारी पारंपरिक तालविष्कार
संमेलनाच्या दुस-या दिवशी दि. 14 एप्रिलला सकाळी दहा वाजता संमेलनाध्यक्ष डॉ. रामंचंद्र देखणे यांची मुलाखत राजेंद्र हुंजे, नाना शिवले घेणार आहेत. दुपारी एक वाजता पारंपरिक तालवाद्य कचेरी, लोककला तालविष्कार सादर होणार आहे. या कार्यक्रमाचे संगीत संयोजन संतोष घंटे करणार आहेत. त्यात दत्तोबा पाचंगे (चौघडा), राहुल कुलकर्णी (ढोलकी), नंदकुमार भांडवलकर (मृदुंग), विलास अटक (संबळ), श्याम गोराणे सहभागी होणार आहे. अध्यक्षस्थानी गोवा कला अकादमी अनिल सामंत असणार आहेत. दुपारी तीन वाजता ’लोककलांच्या संवर्धनात माध्यमांची भूमिका सकारात्मक की नकारात्मक’ या विषयावर परिसंवाद होणार आहे. या कार्यक्रमाचे सूत्रधार डॉ. प्रकाश खांडगे असणार आहेत.

डॉ. पी. डी. पाटील यांच्या उपस्थितीत समारोप
त्यानंतर सायंकाळी पाच वाजता संमेलनाच सांगता समारोप होणार आहे. यावेळी डॉ. डी. वाय. पाटील विद्यापीठाचे कुलपती डॉ. पी. डी. पाटील, कवी रामदास फुटाणे आदी उपस्थित होणार आहे. त्यानंतर रात्री साठेआठ वाजता नृत्यांगना तेजश्री अडिगे दिग्दर्शित नृत्य कला मंदिर आयोजित महाराष्ट्राची लोकधारा हा कार्यक्रम होणार आहे.