चिदम्बरमांचा पाय खोलात

जयपूर। माजी केंद्रीय मंत्री आणि काँग्रेस नेते पी. चिदम्बरम यांचे पुत्र कार्ती चिदम्बरम आणखी अडचणीत आले आहेत. भ्रष्टाचाराच्या आरोपाखाली सीबीआयने एफआयआर दाखल केल्यानंतर आता अंमलबजावणी संचालनालयही (ईडी) मनी लाँडरिंगप्रकरणी कार्ती यांच्यासह आयएनएक्स मीडियावर एफआयआर दाखल करणार आहे, असे समजते. या दोघांवर विदेशी गुंतवणूक संवर्धन मंडळाकडून मंजुरी मिळवून विदेशी गुंतवणूक मिळवण्यासाठी कथित गैरव्यवहार केल्याचा आरोप आहे.

दरम्यान, सीबीआयनेही सोमवारी कार्ती चिदम्बरम आणि आयएनएक्स मीडियाविरोधात एफआयआर दाखल केला होता. आम्हाला सीबीआयच्या एफआयआरची प्रत मिळाली असून लवकरच काळा पैसा पांढरा केल्याप्रकरणी कार्ती चिदम्बरम आणि आयएनएक्स मीडियाविरोधात एफआयआर दाखल करणार आहोत, अशी माहिती ईडीच्या एका वरिष्ठ अधिकार्‍याने दिली. ईडीने केलेल्या छापेमारीत सापडलेल्या कागदपत्रांच्या आधारे सीबीआयने या दोघांविरोधात एफआयआर दाखल केला होता. याआधीच एअरसेल-अ‍ॅक्सिस प्रकरणात कार्ती यांची ईडीकडून चौकशी सुरू आहे.