चेंबूरमध्ये भारत पेट्रोलियम रिफायनरी प्लान्टमध्ये स्फोट

मुंबई-मुंबईत चेंबूरमध्ये भारत पेट्रोलियमच्या रिफायनरी प्लान्टमध्ये दुपारी ३ वाजता मोठा स्फोट झाला आहे. या स्फोटाच्या आवाज इतका भयानक होता की संपूर्ण माहुलगाव यामुळे अक्षरशःहादरले आहे. चार ते पाच कामगार या स्फोटात जखमी झाले असून आणखी काही कामगार आतमध्ये अडकल्याची माहिती समोर येत आहे.

अग्निशमन दलाच्या पंधरा गाडया आग विझवण्याचा युद्धपातळीवर प्रयत्न करत आहेत. . रिफायनरमधील बॉयलरचा स्फोट होऊन आग भडकली. बीपीसीएलचा अग्निशमन विभाग आणि मुंबई अग्निशमन दल ही आग नियंत्रणात आणण्यासाठी युद्धपातळीवर प्रयत्न करत आहे. या रिफायनरी प्लान्टच्या बाजूला झोपडपट्टीचा परिसर आहे. खबरदारी म्हणून या झोपडपट्टीतल्या रहिवाशांना सुरक्षित स्थळी हलवण्यात येत आहे. माहुलमध्ये भारत पेट्रोलियमचे मोठे रिफायनरी प्लान्टस आहेत.

स्फोट झालेल्या ठिकाणी नेमकी किती जिवीतहानी झाली ते अद्याप समजू शकलेले नाही पण काही कामगार आग लागलेल्या ठिकाणी अडकले आहेत अशी माहिती शिवसेना आमदार तुकाराम काते यांनी दिली. बीपीसीएलच्या हायड्रोक्रॅकर प्लानंटमध्ये स्फोट झाल्याची माहिती असून त्या बाजूला आणखी एका प्लान्ट आहे. या परिसरात मोठया प्रमाणावर तेल टाक्या असून ही आग पसरण्यापासून रोखण्याचे मोठे आव्हान आहे. अन्यथा मोठी दुर्घटना घडू शकते. चेंबूर परिसरात धुराचे साम्राज्य पसरले आहे.