चैनीसाठी दुचाकी चोरणारा अटक

वाकड। मौजमजा करण्यासाठी दुचाकी चोरणार्‍या अट्टल चोरट्यास वाकड पोलिसांनी अटक केली आहे. त्याच्याकडून एक लाख पस्तीस हजार रुपये किमतीच्या पाच दुचाकी जप्त केल्या आहेत. चिंचवड, भोसरी आणि देहूरोड येथून या दुचाकी त्याने चोरल्या आहेत. ही कारवाई वाकड येथील कस्पटे वस्तीत करण्यात आली. दीपक बबन ठाकूर (वय 19, रा. पिंपरी) असे अटक केलेल्या सराईत चोरट्याचे नाव आहे.

वाकडमधील वाहन चोरीच्या घटनांचा तपास करत असताना तपास पथकातील सहायक पोलिस निरीक्षक बालाजी पांढरे हे परिसरात गस्त घालत असताना पोलिस उपनिरीक्षक तुकाराम फड यांना एक वाहन चोर कस्पटे वस्ती येथील छत्रपती चौकात अ‍ॅक्टीव्हा मोपेड दुचाकीसह थांबला असल्याची माहिती मिळाली. पोलिसांनी या ठिकाणी सापळा रचून दीपक ठाकुरला ताब्यात घेऊन दुचाकीच्या कागदपत्रांची चौकशी केली. चौकशी दरम्यान समाधानकारक माहिती मिळाली नसल्याने त्याला वाकड पोलिस ठाण्यात आणून चौकशी केली असता त्याच्याकडे असलेली दुचाकी चोरीची असल्याचे त्याने सांगितले. त्याने पुणे शहर आणि ग्रामीण भागात दुचाकी चोरल्याचीदेखील कबुली दिली. पोलिसांनी दीपक याच्याकडून अ‍ॅक्टीव्हा, पल्सर, चिंचवड पोलिस ठाण्याच्या हद्दीमधून चोरलेली स्पेंडर, भोसरी येथून डि.ओ. मोपेड, देहूरोड येथून स्पेंडर अशा एकूण एक लाख पस्तीस हजार रुपयांच्या पाच दुचाकी जप्त केल्या आहेत. मौजमजा करण्यासाठी ही वाहने चोरली असल्याचे तपासात निष्पन्न झाले.