चोरीचे डांबर घेवून जाणार्‍या दोघांना अटक
धुळे । मुंबई – आग्रा महामार्गावर संशयितरित्या उभ्या असणार्‍या ट्रकची विचारपूस केली असता चालकाकडून उडवा-उडवीची उत्तरे मिळाल्यामुळे ट्रकमधील डांबर चोरीचा असल्याचा संशय पोलिसांना आला. याप्रकरणी दोन जणांना अटक करण्यात आली आहे. ट्रकसह साडेपाच लाखांचा मुद्देमाल जप्त करण्यात आला आहे. ही कारवाई मोहाडी पोलिसांनी केली. मोहाडी पोलीस ठाण्याचे सहाय्यक पोलीस निरीक्षक अभिषेक पाटील, कर्मचारी श्याम निकम, युवराज पाटील, प्रमोद नंदेवार हे पथक मुंबई आग्रा महामार्गावर रात्रीची गस्त घालत होते़ हॉटेल रेन्सीडेन्सी पार्कसमोर एमएच 04 सीए 6130 क्रमांकाचा ट्रक संशयितरित्या उभा असलेला पथकाला दिसला़
चौकशीत उडवाउडवीची उत्तरे
ट्रक चालक अल्ताफ अहमद अब्दुल हमीद शेख (38) आणि सहचालक शेख यासीन शेख इस्माईल (19) दोघे रा़ मालेगाव यांची विचारपूस करण्यात आली़ त्यावर त्यांनी उडवा-उडवीची उत्तरे दिली. यातून पोलिसांचा संशय बळावला़ ट्रकची तपासणी केली असता त्यात दीड लाख रुपये किंमतीचे डांबराचे 40 ड्रम आढळून आले़ हा चोरीचा माल असल्याचा पोलिसांना संशय आल्याने ट्रकसह डांबर असा एकूण साडेपाच लाखांचा मुद्देमाल मोहाडी पोलिसांनी जप्त केला आहे़ ट्रक चालक, सहचालक यांना अटक केली असून गुन्हा दाखल करण्यात आला. घटनेचा पुढील तपास पोलीस कर्मचारी श्याम निकम करीत आहेत.