छत्रपती संभाजीमहाराज उद्यानातील मत्स्यालयाच्या प्रवेश शुल्कात वाढ!

पुणे । जंगली महाराज रस्त्यावरील महापालिकेच्या छत्रपती संभाजी राजे उद्यानामधील मत्स्यालयाच्या प्रवेशासाठी प्रौढास दोन रुपये आणि लहान मुलाला एक रुपया शुल्क आकारले जात आहे. त्यामुळे मत्स्यालयाचा वाढीव विस्तार पाहता प्रवेश शुल्कात वाढ करून ते प्रौढास 20 रुपये आणि लहानास 10 रुपये करण्याचा प्रस्ताव स्थायी समितीच्या बैठकीच्या कार्यपत्रिकेवर आयुक्त कुणाल कुमार यांनी ठेवला आहे.

शास्त्रीय पद्धतीने मत्स्यसंगोपणाबाबत माहिती देण्यात येते
छत्रपती संभाजीराजे उद्यानामध्ये हे मत्स्यालय असल्याने नागरिकांचा उत्तम प्रतिसाद मिळत आहे. शालेय सहली आणि अभ्यास यांना शास्त्रीय पद्धतीने मत्स्यसंगोपणाबाबत माहिती देण्यात येते. मत्स्यालयासाठी जागा अपुरी होत असल्याने त्यांच्या विस्तारीकरणाची गरज भासू लागली आहे. नागरिकांनीही मोठ्या आकारातील मत्स्यालयाची व आणखी विविध प्रकारचे मासे पाहण्याची संधी उपलब्ध करून देण्याबाबत तोंडी विनंती केली होती. त्यानुसार खात्याने मत्स्यालयाच्या मागील बाजूस आणि पोर्चमध्ये मोठ्या आकाराचे अद्ययावत वैविध्यपूर्ण मत्स्यालय विस्तारित केले आहे. या मत्स्यालयाचे लवकरच लोकापर्ण करण्यात आले असून सर्व तयारी अंतिम टप्पात आहे. सध्याचे प्रचलित दर प्रौढास 2 रुपये आणि लहान मुलांना एक रुपया हे फारच कमी आहेत. त्यामुळे मत्स्यालयाचा वाढीव विस्तार पाहता दर वाढवावेत असे या प्रस्तावात नमूद केले आहे.

1 ऑगस्ट, 1953 पासून कार्यरत
महापालिकेचे स्वत:चे गोड्या पाण्यातील शोभिवंत माशांचे मत्स्यालय 1 ऑगस्ट, 1953 पासून कार्यरत आहे. या मत्स्यालयाची जागतिक मत्स्यालयात 1971 साली नोंदणी करण्यात आली आहे. हे मत्स्यालय सुरू करताना 45 लोखंडी टाक्या होत्या. या टाक्यांमध्ये शोभिवंत मासे ठेवण्यात आले होते. त्यानुसार नागरिकांकडून प्रवेश शुल्क प्रौढास 1 रुपये, लहान मुलांसाठी 50 पैसे आकारण्यात येत होते.

2004 दुसर्‍यांदा नूतनीकरण
1 जानेवारी, 1994 ते 18 मे 1994 या कालावधीत हे मत्स्यालय बंद ठेवून त्यांचे नूतनीकरण करण्यात आले होते. त्यात लोखंडी साचा काढून सिमेंटच्या टाक्या बनवून पुढील भागात काच बसविण्यात आली होती. त्यानंतर प्रौढांना 2 रुपये आणि लहान मुलांना 1 रुपये शुल्क आकारण्यात येऊ लागले. या मत्स्यालयाचे 2004 दुसर्‍यांदा नूतनीकरण करण्यात आले.