जनता पाठीशी असल्याने शिवसेनेच्या बंडखोरीची चिंता नाही: रोहिणी खडसे

जळगाव: आज विधानसभा निवडणुकीसाठी पंतप्रधान नरेंद्र मोदी यांची जळगावात सभा होत आहे. यावेळी जळगाव जिल्ह्यातील महायुतीचे सर्व उमेदवार हजर आहे. मुक्ताईनगरमधून भाजपच्या उमेदवार असलेल्या रोहिणी खडसे या देखील याठिकाणी हजर झाल्या असून त्यांनी माध्यमांशी संवाद साधला. मुक्ताईनगरमधून यंदा माजी मंत्री एकनाथराव खडसे यांना उमेदवारी नाकारण्यात आली असून त्यांच्या कन्या रोहिणी खडसे यांना उमेदवारी देण्यात आली आहे. त्यामुळे खडसे नाराज असल्याचे बोलले जात आहे. मात्र माझे वडील एकनाथराव खडसे हे माझ्या उमेदवारीमुळे खुश असून मुक्ताईनगर मतदार संघात माझ्या उमेदवारीमुळे कोणीही नाराज नसल्याचे रोहिणी खडसे यांनी सांगितले.

मुक्ताईनगरमध्ये शिवसेनेचे चंद्रकांत पाटील यांनी बंडखोरी करत उमेदवारी केली आहे. यावर बोलताना रोहिणी खडसे यांनी जनता भाजपच्या पाठीशी असून आम्हाला विजय मिळणार यात शंका नाही असे सांगितले.

मुक्ताईनगरमधून माझा विजय होणार असल्याचा दावा देखील त्यांनी यावेळी केला. खडसे यांना उमेदवारी न दिल्याने भाजपला फटका बसेल असे बोलले जात आहे, याबाबत त्यांना विचारले असता त्यांनी तसे काहीही होणार नसल्याचे सांगितले.