जपानने पुण्यातील ऐतिहासिक वास्तूंच्या पर्यटनास चालना द्यावी

पुणे । शहराला ऐतिहासिक व पुरातनदृष्ट्या प्रचंड महत्त्व आहे. अनेक ऐतिहासिक वास्तूंचे जतन करण्यात आले आहे. या वास्तूंचे महत्त्व लक्षात घेऊन जपानने पुण्यात पर्यटनास चालना व प्रोत्साहन देण्याचे आवाहन महापौर मुक्ता टिळक यांनी शुक्रवारी जपानमधील वाकायामा स्टेटमधील जपानच्या शिष्टमंडळाबरोबर केले. महापालिकेतर्फे सिंहगड रस्त्यावरील उभारलेल्या पु.ल. देशपांडे उद्यानांमधील पुणे-ओकायामा मैत्री उद्यानाचा (जापनीज गार्डन) शुक्रवारी 12 वा वर्धापनदिन होता. असोसिएशन ऑफ फ्रेंड्स ऑफ जपान व महापालिकेच्या उद्यान विभागातर्फे सकाळी 7 वाजता वर्धापनदिनानिमित्त उद्यानाचा वाढदिवस आयोजित केला होता. महापौर टिळक यांच्या हस्ते केक कापून उद्यानाचा वाढदिवस उत्साहात साजरा करण्यात आला. याप्रसंगी असोसिएशन ऑफ फ्रेंड्स ऑफ जपान-पुणेचे अध्यक्ष समीर खळे, स्मिता भागवत, जपानमधील वाकायामा स्टेटचे प्रमुख सेईझो त्सुजी, वाकायमा स्टेटचे प्रतिनिधी शिंजी आराई, ताकाओ ईईझावा, योजी यामासकी, नगरसेविका अनिता कांबळे, महापालिकेच्या उद्यान विभागाचे मुख्य अधीक्षक घोरपडे, अधीक्षक संतोष कांबळे आदी उपस्थित होते. यावेळी महापौर व खळे यांनी सर्वांना केक देऊन वाढदिवसाचा आनंद साजरा केला.

महापौर म्हणाल्या, पुणे-ओकायामा मैत्री उद्यान हे पुणे व जपानच्या संस्कृतीचे प्रतीक आहे. बाहुलीचे कायमस्वरूपी प्रदर्शन संग्रहालय उभारण्याची इच्छा आहे. ते लवकरच पूर्ण होईल. त्सुजी म्हणाले की, महाराष्ट्र शासन व वाकायामा स्टेट यांच्यात मुख्यमंत्री देवेंद्र फडणवीस यांनी सांस्कृतिक आर्थिक आदानप्रदान विषयक सामंजस्य करार केला आहे. यानुसार आम्ही काम करणार आहे. पुण्यात पर्यटनास प्रोत्साहन देण्यासाठी जपान सरकारकडे आपण प्रयत्न करण्याचे आश्‍वासन त्यांनी यावेळी दिले.