जया प्रदा यांच्याबद्दल वादग्रस्त वक्तव्य भोवले; आजम खान यांच्यावर गुन्हा दाखल

रामपूर : निवडणूक प्रचारादरम्यान समाजवादी पार्टीचे नेता आजम खान यांनी भाजपा उमेदवार जया प्रदा यांच्याबद्दल अश्लील वक्तव्य केले होते. याप्रकरणी आजम खान यांच्याविरोधात गुन्हा दाखल करण्यात आला आहे. रामपूरच्या शाहाबाद पोलीस ठाण्यात यासंदर्भात एफआयआर दाखल करण्यात आला आहे. शाहाबाद मेजिस्ट्रेट महेश कुमार गुप्ता यांच्या तक्रारीनंतर हा गुन्हा दाखल करण्यात आला आहे. ‘ज्यांना हात पकडून आम्ही रामपूरमध्ये आणले, १० वर्षे प्रतिनिधित्व केले. त्यांचा खरा चेहरा समजण्यासाठी १७ वर्षे लागली. १७ दिवसांमध्ये कळाले की यांची अंतरवस्त्रे खाकी रंगाची आहे’, अशा अश्लील शब्दात आजम खान यांनी टीका केली होती.

आजम खान यांच्या वादग्रस्त वक्तव्यावर परराष्ट्र मंत्री सुषमा स्वराज यांनी मुलायम सिंह यांनी एक पत्र ट्वीट केले आहे. मुलायम भाई, तुम्ही समाजवादी पार्टीचे पितामह आहात. तुमच्या समोर रामपूरमध्ये द्रौपदीचे चीर हरण होत आहे. तुम्ही भीष्माप्रमाणे मौनात राहण्याची चूक करु नका.

रामपूर समाजवादी पार्टीचे उमेदवार आजम खान यांनी आपल्या वादग्रस्त विधानाबद्दल वक्तव्य केले आहे. मी नऊ वेळा रामपूरचा आमदार होतो. मंत्री देखील होतो. काय बोलायचे ते मला माहिती आहे. मी माझ्या विधानामध्ये कोणाचे नाव घेतले हे सिद्ध करुन दाखवावे. जर मी कोणाचा अपमान केला आहे हे जर सिद्ध झाले तर निवडणुकीतून माघार घेईन असे त्यांनी सांगितले.