जलद 12 शतके आणि 4 हजार धावा
विशाखापट्टणम । श्रीलंकेविरुद्धच्या तिसर्‍या एकदिवसीय सामन्यामध्ये भारताचा 8 विकेट्सनी शानदार विजय झाला. या विजयाबरोबरच भारताने तीन एकदिवसीय सामन्यांची मालिका 2-1 ने जिंकली. तिसर्‍या एकदिवसीयमध्ये भारताच्या विजयाचा शिल्पकार ठरला शिखर धवन. धवनने 85 चेंडूंमध्ये 100 धावांची खेळी केली. या खेळीमध्ये धवनने 13 चौकार आणि दोन षटकार लगावले. श्रेयस अय्यरसोबत धवनने 135 धावांची महत्त्वपूर्ण भागीदारी केली. या सामन्यामध्ये शिखर धवनने आंतरराष्ट्रीय एकदिवसीय सामन्यांमधील चार हजार धावा पूर्ण केल्या आहेत. धवनने 95 डावांमध्ये चार हजार धावा केल्या. एवढ्या जलद चार हजार धावा पूर्ण करणार्‍या भारतीयांमध्ये धवन दुसर्‍या क्रमांकावर पोहोचला आहे. आंतरराष्ट्रीय क्रिकेटमध्ये सर्वात जलद चार हजार धावांचा टप्पा गाठणारा पहिला भारतीय फलंदाज विराट कोहली आहे. आंतरराष्ट्रीय एकदिवसीय क्रिकेटमध्ये सर्वात जलद चार हजार धावा दक्षिण आफ्रिकेच्या हाशीम आमलाने पूर्ण केल्या आहेत. आमलाने 81 डावांमध्ये चार हजार धावा पूर्ण केल्या होत्या. दुसर्‍या क्रमांकावर व्हिव्हियन रिचर्ड्स यांनी 88 डावांमध्ये, तिसर्‍या क्रमांकावर जो रुट आणि चौथ्या क्रमांकावर विराट कोहलीचा नंबर लागतो. या यादीमध्ये शिखर धवन सहाव्या क्रमांकावर आहे.
12 शतकेही जलद
आंतरराष्ट्रीय क्रिकेटमध्ये सर्वात जलद 12 शतके लगावण्यार्‍या खेळाडूंच्या यादीमध्ये धवन पाचव्या क्रमांकावर पोहोचला आहे. धवनने 95 डावांमध्ये 12 शतके लगावली आहेत. दक्षिण आफ्रिकेच्या क्विंटन डिकॉकने एकदिवसीय क्रिकेटमध्ये सर्वात जलद 12 शतके लगावली आहेत. डिकॉकने 74 डावांमध्ये 12 एकदिवसीय शतके लगावली होती. दुसर्‍या क्रमांकावर हाशीम आमला आहे. आमलाने 81 डावांमध्ये हे विक्रम केले होते, तर विराटने 83 डावांमध्ये 12 शतके पूर्ण केली होती.