अमळनेर शहरात व्यापाऱ्यावर गोळीबार

अमळनेर: शहरातील मध्यवर्ती ठिकाणी असलेल्या न्यू प्लॉट भागातील नर्मदा वाडी जवल एका एका व्यापाऱ्यावरअज्ञात चोरट्यांनी गोळीबार करून हातातील बॅग लुटण्याचा प्रयत्न केला. घटना ३ रोजी रात्री अकराच्या सुमारास घडली. गोळीबार केल्यानंतर चोरटे लगेच पसार झाले. कृउबा समितीचे संचालक शंकरशेठ बितराई यांचे भाऊ बसंतालाल बितराई व त्यांचा मुलगा अजय दुकान बंद करून घरी परतले. घराजवळ पोहचले असता सेंट्रल बँकेकडून दोन अज्ञात व्यक्ती मोटारसायकलवर आले. त्यांनी दोघांच्या हातातून खाली बॅग व जेवणाचा डबा हिसकावण्याचा प्रयत्न करीत असताना गोळीबार केला. सुदैवाने गोळी दोघांच्या मधून जाऊन भिंतीला लागली.

सदर घटनेचे वृत्त कळताच भरत ललवाणी घटनास्थळी पोहचून त्यांनी पोलिसांना माहिती दिली. त्यानंतर सपोनि प्रकाश सदगीर, शरद पाटील, रवी पाटील, हितेश चिंचोरे हे पोलीस कर्मचारी घटनास्थळी पोहचले. त्यांनी पंचनामा केला व परिसरातील सीसीटीव्ही कॅमेऱ्याची तपासणी केली. चार वर्षांपूर्वीही याच ठिकाणी या व्यापाऱ्याला लुटण्याचा प्रयत्न झाला होता. अशा घटना वारंवार घडत असल्याने शहरातील नागरिकांमध्ये भीतीचे वातावरण निर्माण झाले आहे.