जलसंधारण बंधार्‍यांचे संतांच्या हस्ते जलपूजन

यावलसह रावेर तालुक्यात थेंब अमृताच्या मोहिमेला संत-महंतांच्या आशीर्वाद, मार्गदर्शनाने आले यश

फैजपूर : गतवर्षी यावलसह रावेर तालुक्यात पर्जन्यमान कमी झाल्यामुळे यावलसह रावेरचा भाग हा दुष्काळी जाहीर करावा लागल्याने व दोघा तालुक्यांमध्ये केळी हे मुख्य पीक असल्याने या भागातील पाण्याची पातळी खालावली होती. पुन्हा अशीच परीस्थिती यावर्षी या भागावर येऊ नये म्हणून या भागातील संत महंत यांच्या आशीर्वादाने ‘थेंब अमृताच्या’ लोक सहभागातून जलसंधारणाची कामे मार्च ते जून महिन्यांपर्यंत राबवण्यात आली. या कामांचे फरीत साध्य होऊन ज्या भागात खोलीकरण व चर मारणे बंधारे दुरुस्त करणे अशी कामे लोकसहभागातून झाली तेथे दोन दिवसांच्या पावसाने पूर्ण नदी-नाले तुडुंब भरून वाहू लागल्याने सोमवारी महामंडलेश्‍वर जनार्दन हरीजी महाराज, स्वामीनारायण गुरुकुलचे भक्तीस्वरूप दाजी व आमदार हरीभाऊ जावळे यांच्या माध्यमातून नावरे, रोझोदा, सातोद या ठिकाणी विधीवत जलपूजन करण्यात आले.

संतांच्या आशीर्वाद, मार्गदर्शन नदी, नाले ओसंडले
मार्च महिन्यात संतांच्या संकल्पनेनुसार या थेंब अमृताच्या जलसंधारण कामाला सुरुवात झाली. या अभियानात सर्व नागरीकांनी तन-मन-धनाने आपल्या परीने जी मदत या अभियानाला देता येईल ती देण्याचा प्रयत्न केला. साकळीजवळील नावरे बंधारा हा 2006 पासून वाहून गेला होता. या भागातील नागरीकांसाठी हा बंधारा तयार करणे हे एक मोठे आव्हानच होते यासाठी स्थानिक लोकप्रतिनिधी यांनी प्रयत्न केले. या प्रयत्नांना थेंब अमृताच्या लोकसहभाग चळवळीतून यश मिळाले आणि दोन दिवसांपूर्वीच झालेल्या मुसळधार पावसात नावरे बंधारा तुडुंब वाहू लागला. नदी, नाले खोलीकरण तसेच नद्यांमध्ये उभे आडवे बोअर मारणे अशी कामे दोन महिन्यात नागरीकांनी स्वतः थांबून केली. महामंडलेश्वर जनार्दन हरीजी महाराज, भक्तीप्रकाशदाजी शास्त्री, भक्ती स्वरूपदासजी, प.पू.मानेकर बाबा, प.पू.स्वरूपानंद महाराज या सर्व संतांच्या आशीर्वादाने हे सर्व यशस्वी झाले तर आमदार हरीभाऊ जावळे यांनीदेखील चांगल्या प्रकारे थेंब अमृताच्या या लोकसभा चळवळीला मदत केली.

40 कोटी लीटर पाणी जमिनीत मुरले
रोझोदा येथील सुखी नदीत आता 24 तास पाणी यायला लागले असून थेंब अमृताच्या लोकसहभाग चळवळीतून झालेल्या जलसंधारणाची खोलीकरणामुळे आतापर्यंत 40 कोटी लिटर पाणी जमिनीत जिरल्याने रोझोदा परीरसरातील नागरीक समाधानी आहे.

जलपूजनप्रसंगी यांची होती उपस्थिती
नावरे बंधार्‍याचे जलपूजन करताना महामंडलेश्‍वर जनार्दन हरीजी महाराज, भक्तीस्वरुपदासजी, आमदार हरीभाऊ जावळे, जिल्हा परीषदेचे माजी सदस्य हर्षल पाटील, जेडीसीसी बँक संचालक गणेश नेहेते, कृषी उत्पन्न बाजार समितीचे माजी सभापती नारायण चौधरी, यावल पंचायत समितीचे गटनेते दीपक पाटील, कृषी उत्पन्न बाजार समितीचे माजी संचालक विलास पाटील, साकळी ग्रामपंचायत सदस्य साहेबराव बडगुजर, दीपक पाटील, दिनकर माळी तसेच परीसरातील नागरीक व शेतकरी मोठ्या संख्येने उपस्थित होते.