जळगावातील वृद्धेला दहा लाखांचा गंडा : आरोपी जाळ्यात

जळगाव : शहरातील हायवेदर्शन कॉलनीतील वृध्द महिलेची नऊ लाख 62 हजार 181 रुपयांत ऑनलाईन फसवणूक करण्यात आली होती. या प्रकरणी गुन्हा दाखल करण्यात आल्यानंतर आरोपीला जळगाव साबयर पोलिसांनी अटक केली. दीपक सुभाष अहिरे (रा.निभोंरा, ता.सोयगाव, जि.औरंगाबाद) असे अटकेतील संशयिताचे नाव आहे.

फसवणूक प्रकरणी दाखल होता गुन्हा
जळगाव शहरातील हायवेदर्शन कॉलनीतील नलिनी राजाराम देसाई (62) यांना पतीच्या निधनानंतर निराधार योजनेतंर्गत एक हजार रुपये पेन्शन मिळायची. ही पेन्शन त्यांच्या बँक खात्यात जमा व्हायची. त्यांच्या घरात राहत असलेला भाडेकरु दीपक अहिरे हा नलिनी यांना बँकेच्या खात्यातून पैसे काढून देण्यासाठी मदत करायचा. काही दिवसांनंतर मधुमेह व रक्तदाबाचा त्रास होत असल्याने नलिनी देसाई यांनी त्यांचे घर विक्री केले. त्यातून मिळालेल्या पैशांचा धनादेश संबंधितांने नलिनी यांच्या बँक खात्यावर जमा केला होता. घर विकल्यानंतर नलिनी या त्यांच्या शिरपूर येथील बहिणीकडे राहत आहेत. गुरुवार, 9 जून रोजी नलिनी या नेहमीप्रमाणे बँकेत पेन्शन काढण्यात आल्या असत्या, त्यांना त्यांच्या घराच्या विक्रीतून मिळालेले 9 लाख 50 हजार रुपये खात्यावर दिसून आले नाही. बँकेत विचारणा केल्यावर कुणीतरी अनोळखी व्यक्तीने 20 जानेवारी ते 20 मे 2022 दरम्यान वेळावेळी युपीआयव्दारे ऑनलाईन पैसे काढून घेतल्याचे लक्षात आले. याबाबत नलिनी देसाई यांनी जळगाव सायबर पोलिसात तक्रार दिली होती. त्यावरुन गुरुवार, 9 जून रोजी गुन्हा दाखल करण्यात आला.

तांत्रिक विश्लेषणाअंती आरोपी निष्पन्न
या गुन्ह्यात नलिनी यांच्या बँकेच्या संलग्नित मोबाईल क्रमाकांचे कॉल डिटेल्स, बँक खात्याची माहिती व तांत्रिक विश्लेषणाच्या आधारावर तपास करत फसवणूक ही निंभोरा येथील दीपक अहिरे याने केल्याचे निष्पन्न झाले होते, त्यानुसार पोलिस निरीक्षक लिलाधर कानडे यांच्या मार्गदर्शनाखाली पोलिस नाईक दिलीप चिंचोले, दहप्ती अनफाट, गौरव पाटील, दीपक सोनवणे व श्रीकांत चव्हाण यांच्या पथकाने शुक्रवारी दीपक सुभाष अहिरे यास अटक केली. त्याने वृध्द महिलेचे सीमकार्ड जुने झाल्याचा बहाणा करत ते स्वत:जवळ ठेवले तसेच त्यावरुन युपीआय आयडीव्दारे नलिनी यांच्या बँक खात्यावरुन एकूण नऊ लाख 62 हजार 181 रुपये काढून फसवणूक केल्याचे समोर आले आहे. संशयीतास जिल्हा न्यायालयात हजर केले असता न्यायालयाने 4 दिवसांची पोलिस कोठडी सुनावली आहे.