जळगावात अपघातात वृद्धेचा मृत्यू : अज्ञात ट्रक चालकावर गुन्हा दाखल

जळगाव : शौचास जाणार्‍या 65 वर्षीय वृद्धेचा भरधाव ट्रकने उडवल्याने मृत्यू झाला. अपघातानंतर न थांबता ट्रकचालक सुसाट धुळ्याच्या दिशेने पसार झाला होता. याप्रकरणी रामानंदनगर पोलिसात अज्ञात ट्रकचालकाविरोधात गुन्हा दाखल करण्यात आला.

अज्ञात ट्रक चालकाचा पोलिसांकडून शोध
रमणबाई रामराव पाथरवट (65) या शहरातील भगीरथ कॉलनी येथे कुटूंबीयांसह वास्तव्यास असून मातीचे माठ विक्री करुन उदनिर्वाह करीत होत्या. त्या आयटीआय जवळ रस्त्यावर माठविक्री करीत होत्या तर तात्पुरत्या झोपड्या उभारून तेथेच वास्तव्यास होत्या. शनिवार, 12 फेब्रुवारी रोजी सकाळी आठ वाजता रमणबाई पाथरवट या शौचास निघाल्या असताना महामार्गाच्या बाजुने पायी चालत असतांना आकाशवाणी चौकाकडून सुसाट वेगात आलेल्या अज्ञात ट्रकने त्यांना जोरदार धडक दिली. अपघातानंतर ट्रकचालक न थांबता धुळ्याच्या दिशेने पसार झाला. अपघातात जखमी रमणबाई यांचा मृत्यू झाला होता. बारा दिवसानंतर गुरूवार, 24 फेब्रुवारी रोजी मयत महिलेचा मुलगा भैय्यासाहेब राजेंद्र पाथरवट यांच्या फिर्यादीवरून रामानंद नगर पोलिस ठाण्यात अज्ञात ट्रक चालकाविरोधात गुन्हा दाखल करण्यात आला असून पोलिसांनी ट्रक चालकाचा शोध सुरू केला आहे. पुढील तपास महिला पोलिस कॉन्स्टेबल उषा सोनवणे करीत आहे.