जळगावात दुमजली इमारत कोसळली : सुदैवाने बचावले कुटुंब

जळगाव : शहरात दुमजली इमारत अचानक कोसळल्याची घटना शनीपेठ परीसरात असलेल्या मनपा गंगुबाई शाळेसमोर असलेली गुरुवारी पहाटेच्या सुमारास घडली. सुदैवाने वेळीच नागरीक बाहेर पडल्याने बचावले तर ढिगार्‍यात अडकलेल्या एका वृद्धेला परीरसरातील तरुणांनी सुखरूप बाहेर काढले. या घटनेत लाखोंचे नुकसान झाले आहे. किरकोळ जखमी झालेल्या नागरीकांना तातडीने उपचारार्थ हलवण्यात आले.

अचानक कोसळली इमारत
जळगावातील शनीपेठेत असलेल्या कै.गंगुबाई यादव शाळेसमोर एका इमारतीच्या बांधकामासाठी खोल खड्डा खोदण्यात आला आहे. बांधकामधीन इमारतीच्या शेजारी असलेली घरे लोडबेरींग पद्धतीची असल्याने त्यांना देखील धोका निर्माण झाला होता. गुरुवारी पहाटे पाच वाजेच्या सुमारास अचानक इमारत कोसळली. इमारतीमध्ये ढिगार्‍याखाली अडकलेल्या एका 75 वर्षीय वृद्धेला सुखरूप बाहेर काढण्यात आले. पहाटेेच्या सुमारास इमारतीची माती पडायला सुरुवात झाल्याने नातू रोहित पाटील याला जाग आली. प्रसंगावधान राखत त्याने लागलीच कुटुंबीय रमेश पाटील, शोभा पाटील यांच्यासह दिवाळीनिमित्त माहेरी आलेल्या बहिणी सोनाली पाटील, गायत्री पाटील व एका पाच वर्षीय चिमुकली यांना बाहेर काढले. सर्व जिन्यावर येताच इमारत कोसळली.

वृद्धेचा तरुणांनी वाचवला जीव
कोसळलेल्या इमारतीच्या खालील खोलीत कलाबाई पाटील (75) या वृद्धा राहत होत्या. वरील मजल्यावरील सर्वांना बाहेर काढल्यानंतर आजीला बाहेर काढण्याच्या आतच इमारत कोसळली. हाडांना आणि छातीला मार लागल्याने वृद्धा हालचाल करू शकत नव्हत्या. परिसरातील तरुण कृणाल महाजन, रज्जाक सैय्यद, रोहित पाटील, इम्रान खान, वाहिद खान, वसीम खान, शाहिद खान यांच्यासह मनपा अग्निशमन दलाचे अधिकारी शशिकांत बारी, कर्मचारी संतोष तायडे, रोहिदास चौधरी, भगवान पाटील, प्रदीप धनगर, सरदार पाटील, जगदीश साळुंखे, रवींद्र बोरसे, सोपान जाधव, पन्नालाल सोनवणे, नासिर शौकत अली, नितीन बारी आदींनी बचावकार्यात सहभाग घेत वृद्धेची सुखरूप सुटका केली.

इमारत कोसळल्याने लाखोंचे नुकसान
घरातील सोने, वस्तू, दागिन्यांसह दुचाकी आणि खालील गोडावूनमध्ये असलेले सर्व साहित्य ढिगार्‍यात दाबले गेले आहे. घरातील दोन गॅस सिलेंडर वेळीच बाहेर काढल्याने मोठा अनर्थ टळला आहे.

अग्निशमन दलाने घेतली धाव
घटनेची माहिती मिळताच महानगरपालिकेचे अग्निशमन विभागाचे मुख्य अधिकारी शशिकांत बारी त्यांच्या कर्मचार्‍यांसह घटनास्थळी आले. त्यांनी मदत कार्याला सुरुवात केली. त्यांच्यासोबत संतोष तायडे, रोहिदास चौधरी, भगवान पाटील, प्रदीप धनगर, सरदार पाटील, जगदीश साळुंखे, रवींद्र बोरसे, सोपान जाधव, पन्नालाल सोनवणे, नासिर अली शौकत अली नितीन बारी हे कर्मचारी उपस्थित होते.