जळगावात महिलेवर प्राणघातक हल्ला

जळगाव प्रतिनिधी । महिला एकटी असल्याची संधी साधून शेजारी राहणार्‍या एका तरुणाने घरात घुसून तिच्या अंगावरील दागिने ओरबाडण्याचा प्रयत्न केल्याची घटना शहरातील शंकरअप्पा नगरात घडली.

शंकरअप्पानगरात राहणार्‍या प्रतिभा पाटील या वरच्या मजल्यावरील घरात एकट्या होत्या. ही संधी साधून मनोज शिवाजी चंदेले याने घरात शिरून त्यांच्या अंगावरील दागिने ओरबाडण्याचा प्रयत्न केला. विरोध करताच मनोजने हातातील चाकूने प्रतिभा यांच्या मानेवर, छातीवर व पाठीवर असे एकूण चार वार केले. या हल्ल्यात प्रतिभा पाटील या गंभीर जखमी झाल्या आहेत. तर त्यांच्या किंचाळ्या ऐकून खालच्या मजल्यावर राहणारे तसेच शेजारच्यांनी वरती धाव घेतली. परंतु, मनोज याने आतून दरवाजा बंद केलेला असल्यामुळे नागरिकांना काहीच करता येत नव्हते. अखेर नागरिकांनी घराचा दरवाजा तोडून घरात प्रवेश मिळवला. यानंतर प्रतिभा पाटील यांना रुग्णालयात दाखल करण्यात आले असून त्यांच्यावर अतिदक्षता विभागात उपचार सुरू आहेत.