जळगावात विवाहित तरुणीचा विनयभंग

जळगाव : ‘तू माझी नाही झाली तर तुला कोणाचीच होवू देणार नाही’, असे म्हणत शहरातील एका भागात तरुणाने विवाहित तरुणीला खोलीत डांबून ठेवत तिचा विनयभंग केला शिवाय तरुणाने तरुणीच्या कुटुंबियांना जीवे ठार मारण्याची धमकी दिली. या प्रकरणी शुक्रवार, 20 मे रोजी जळगाव तालुका पोलिस ठाण्यात निखील सोनवणे (रा.आहुजा नगर, निमखेडी, जळगाव) याच्याविरुद्ध विनयभंगासह इतर कलमान्वये गुन्हा दाखल करण्यात आला.

चाकूच्या धाकावर अपहरण करीत विनयभंग
जळगाव शहरातील एका भागातील विवाहित तरुणी गुरुवार, 12 मे 2022 रोजी दुपारी तीन वाजता घराकडे जात होती. यावेळी निखील वना सोनवणे (आहुजा नगर निमखेडी, जळगाव) याने त्याच्या जवळील मोटारसायकल रस्त्यात आडवी लावून तरुणीचा रस्ता अडवला व तू माझी नाही झाली तर तुला मी कोणाचीच होवू देणार नाही, असे म्हणून त्याने त्याच्या हातातील चाकूचा धाक दाखवून तरुणीच्या हातातील फोन हिसकावून घेतला. त्यानंतर तरुणीला मोटारसायकलीवर बसवून शिवाजी नगरातील त्याच्या मावशीच्या घरी नेवून तरुणीला एका खोलीत कोंडून ठेवले. आरोपीने पीडीत तरुणीच्या वडिलांना शिवीगाळ केली असून तरुणीच्या कुटुंबीयांना जीवे ठार मारण्याची धमकी दिल्याचा आरोप आहे. या प्रकरणी शुक्रवारी पीडित तरुणीच्या फिर्यादीवरून जळगाव तालुका पोलिस ठाण्यात निखिल सोनवणे याच्याविरुद्ध गुन्हा दाखल करण्यात आला.