जवानांसाठी महापालिकेतर्फे फराळाची भेट

मराठा बटालियनच्या युनिट-18साठी फराळ रवाना

पुणे : देशाच्या रक्षणासाठी सीमेवर अहोरात्र पहारा देणार्‍या लष्करी जवानांसाठी खास दिवाळीच्या फराळाची अनोखी भेट महापालिकेच्या नगरसचिव विभागातील कर्मचार्‍यांनी पाठविली आहे. मराठा बटालियनच्या युनिट-18साठी भोर गावचे मराठा बटालियनमधील जवान तुषार शेटे यांच्या माध्यमातून बुधवारी हा फराळ पाठविण्यात आला. महापौर मुक्ता टिळक, उपमहापौर डॉ. सिद्धार्थ धेंडे, स्थायी समिती अध्यक्ष योगेश मुळीक, सभागृह नेते श्रीनाथ भिमाले, नगरसचिव सुनील पारखी, उपनगरसचिव राजेंद्र शेवाळे, नगरसेवक सचिन दोडके यावेळी उपस्थित होते.

सीमेवर लष्करी जवानांना अहोरात्र देशाच्या रक्षणासाठी खडा पहारा द्यावा लागतो. त्यामुळे त्यांना सणासुदीत घरी जाता येत नाहीत. आहे त्या ठिकाणी आणि आहे त्या परिस्थितीतच ते सण साजरे करतात. या जवानांना दिवाळीचा फराळ सीमेवर मिळावा, यासाठी सामाजिक बांधिलकी जपत हा उपक्रम घेण्यात आला आहे. त्यात नगरविकास विभागाच्या सर्व कर्मचार्‍यांनी आपल्या स्वेच्छेने फराळासाठी मदत केली.