जवान व दहशतवाद्यांमध्ये चकमक; दोन दहशतवादी कंठस्नानी

श्रीनगर – जम्मू-काश्मीरच्या शोपियानममधील हेफ श्रीमल भागात जवान आणि दहशतवाद्यांमध्ये आज मंगळवारी सकाळी चकमक उडाली. यात चकमकीदरम्यान दोन दहशतवाद्यांचा खात्मा करण्यात जवानांना यश आले आहे. परिसरात काही दहशतवादी लपून बसल्याची माहिती सुरक्षा दलांना मिळाली असल्याने शोधमोहीम सुरू आहे.

सीमारेषेवर पाकिस्तानच्या कुरापती दिवसेंदिवस वाढत आहेत. सुरक्षा दल आणि दहशतवाद्यांमध्ये पहाटेपासून चकमक सुरू झाली आहे. शोपियानमध्ये काही दहशतवादी लपून बसल्याची माहिती सुरक्षा दलांना मिळाली होती. त्यामुळे जवानांनी या परिसराला घेराव घातला. त्यानंतर परिसरात शोध मोहीम सुरू करण्यात आली आहे. दोन दहशतवाद्यांचा खात्मा करण्यात जवानांना यश आलं आहे.

जम्मू-काश्मीरच्या बडगाम जिल्ह्यातील चारी शरीफ परिसरात जवान आणि दहशतवाद्यांमध्ये काल सोमवारी सकाळी चकमक सुरू झाली होती. या चकमकीदरम्यान दोन दहशतवाद्यांचा खात्मा करण्यात जवानांना यश आले होते. तसेच जम्मू आणि काश्मीर सीमारेषेवर भारतीय लष्कराने याआधी १७ जानेवारी रोजी पाकिस्तानी सैन्यावर मोठी कारवाई केली होती. पाकिस्तानच्या ५ जवानांना ठार करण्यात आले असून पाकचे अनेक बंकर्सही उद्ध्वस्त करण्यात आले होते.