जाणून घ्या आजच्या मंत्रिमंडळ बैठकीत झालेले महत्त्वाचे निर्णय

मुंबई- राज्य मंत्रिमंडळाची आज बैठक झाली. या मंत्रिमंडळाच्या बैठकीत 8 मोठे निर्णय घेण्यात आले आहेत. केंद्र शासनाने सुरू केलेली ‘खेलो इंडिया-क्रीडा विकासाचा राष्ट्रीय कार्यक्रम योजने’ची 2018-19पासून राज्यात अंमलबजावणी करण्यास मान्यता देण्यात आली.

जीएसटी भरपाई अनुदान देताना आधार वर्ष महसुलाचे सूत्र प्रतिकूल ठरणा-या महापालिकांच्या प्रकरणांमध्ये अनुदान मंजुरीचे अधिकार राज्य शासनाला मिळण्यासाठी संबंधित अधिनियमात सुधारणेचा अध्यादेशाला आजच्या मंत्रिमंडळ बैठकीत मंजुरी देण्यात आली.

शासकीय वैद्यकीय, दंत, आयुर्वेद महाविद्यालये आणि रुग्णालयांची बांधकामे आता केंद्र शासनाच्या अधिपत्याखालील सार्वजनिक कंपन्यांकडून करून घेता येणार, यामध्ये 25 कोटी व त्यापेक्षा जास्त अंदाजपत्रकीय किमतीच्या कामांचाही समावेश आहे.

महत्त्वाचे म्हणजे आजच्या बैठकीत शासकीय प्राथमिक, माध्यमिक आश्रमशाळांचे श्रेणीवाढ करण्याबरोबरच संलग्न माध्यमिक आश्रमशाळा व कनिष्ठ महाविद्यालयांचे वर्ग सुरू करण्यासह आवश्यक पदनिर्मिती व अनुषंगिक खर्चास मान्यता देण्यात आली. अनुदानित प्राथमिक आश्रमशाळांना श्रेणीवाढ करून माध्यमिक आश्रमशाळा करणे व माध्यमिक आश्रमशाळांना श्रेणीवाढ करून कनिष्ठ महाविद्यालये सुरू करण्यासाठी लागणा-या पदनिर्मिती व अनुषंगिक खर्चास मान्यता देण्यात अली.

जवाहर नवोदय विद्यालयाच्या स्थापनेसाठी भंडारा जिल्ह्यातील मौजा पाचगाव(ता. मोहाडी) येथील 8.80 हेक्टर इतकी शासकीय जमीन नाममात्र भुईभाडे आकारून 30 वर्षांसाठी देण्यास मंजुरी मिळाली.