जाहिरात होर्डिंगसाठी यापुढे परवानगी घेणे बंधनकारक

पिंपरी चिंचवड : अनधिकृत फलकांमुळे महापालिकेच्या उत्पन्नात घट होवून शहराचे विद्रुपीकरण वाढले आहे. त्यावर उपाय म्हणून सत्ताधार्‍यांनी महापालिका उत्पन्न वाढीच्या दृष्टीने आकाशचिन्ह व परवाना विभागाने स्वतंत्र ‘बाह्य जाहिरात धोरण’ तयार केली. हे धोरण येत्या महासभेत (दि.20) प्रस्ताव मान्यतेसाठी ठेवण्यात आले आहे. त्या धोरणात अनधिकृत होर्डिंग्ज चालकांवर पाचपट दंडात्मक कारवाई बडगा उगारण्यात येणार असल्याने त्याचे दाबे चांगलेच दणाणले आहेत. जाहिरात होर्डिंगसाठी यापुढे पालिकेची परवानगी घेणे बंधनकारक राहणार आहे. मुंबई प्रांतिक महापालिका कलम 244 व कलम 245 आणि महाराष्ट्र महापालिका अधिनियम (जाहिरात व फलक नियंत्रण) नियम 2003 या नियमांतर्गत स्वतंत्र असे जाहिरात धोरण तयार केलेले आहे. यामुळे पालिकेच्या आर्थिक उत्पन्नात भर पडणार आहे.

  स्वतंत्र ‘बाह्य जाहिरात धोरणाअंतर्गत ‘अ’, ‘ब’, ‘क’ आणि ‘ड’ अशा चार झोनमध्ये विभागणी करण्यात आली आहे. झोन ‘अ’ मध्ये विकसित आणि उच्च घनता विभागात सर्वाधिक जाहिराती क्षमता असलेली क्षेत्रे आहेत. झोन ‘ब’ मध्ये विकसनशील व्यापारी क्षेत्रात कमी वाहतुक घनता असणार्‍या उपनगरीय क्षेत्राचा अंतर्भाव आहे. झोन ‘क’ मध्ये मिश्र वापर विकास क्षेत्र व निवासी किरकोळ विकसित भाग असलेले मध्यम जाहिरात क्षमतेच्या क्षेत्राचा समावेश आहे. झोन ‘ड’ मध्ये किमान जाहिरात क्षमता आणि कमी वाहतुक घनता असलेल्या निवासी क्षेत्राचा समावेश आहे.

रस्तानिहाय झोनिंगमध्ये चार श्रेणी तयार करण्यात आल्या आहेत. त्यात श्रेणी एक मध्ये वाकड ते मुकाई चौक, राजीव गांधी उड्डाणपुल ते डांगे चौक, हॅरीस ब्रीज ते निगडी भक्ती-शक्ती चौक, नाशिक फाटा ते मोशी टोल नाका, आकुर्डी डी. वाय. पाटील कॉलेज ते मुकाई चौक, चिंचवड स्टेशन ते चिंचवडगाव, बिर्ला रूग्णालय ते भुमकर चौक, पिंपरी चौक ते काळेवाडी पुल, नाशिक फाटा ते साई चौक, जगताप डेअरी ते हिंजवडी आणि भुमकर चौक ते विनोदे वस्ती, हिंजवडी टप्पा दोन या रस्त्यांचा समावेश आहे. श्रेणी दोन मध्ये डांगे चौक ते बास्केट पूल, लांडेवाडी ते बजाज मटेरियल गेट, कुदळवाडी चौक ते चिंचवड स्टेशन, वाल्हेकरवाडी ते बास्केट पूल, काळेवाडी पूल ते कस्पटे वस्ती चौक, एम्पायर इस्टेट पुलाचा शेवट ते काळेवाडीतील एम.एम. शाळा या रस्त्याचा समावेश आहे.  श्रेणी तीन मध्ये दिघी ते आळंदी, डुडुळगाव ते चिखली, चिखली ते तळवडे, बो-हाडेवाडी – मार्केटयार्ड ते सीएनजी पंप रस्ता, जय गणेश साम्राज्य ते कृष्णानगर चौक, 16 नंबर ते वाकड या रस्तयांचा समावेश आहे. तर, श्रेणी चार मध्ये शहरातील इतर सर्व रस्त्यांचा समावेश केला आहे.

 जाहिरातधारकाची ओळख पटण्याकरिता जाहिरातदार संस्थेने फलकाच्या रस्त्याकडील बाजूच्या खालील कोप-यात ठरवून दिलेल्या आकारात संस्थेचे नाव, पत्ता आणि परवाना क्रमांक नमुद करणे बंधनकारक आहे. परवाना संपण्याची मुदत महिना व वर्षे हे चिन्हांमध्ये लिहिणे आवश्यक राहणार आहे. अवैध व बेकायदा बाह्य जाहिरातींवर महापालिकेचे नियंत्रण राहील. अशा अवैध जाहिराती काढून टाकण्याचा, त्या नष्ट करण्याचा अधिकार महापालिकेला राहणार आहे. असे उल्लंघन करणार्‍या व्यक्तींना दंडात्मक कारवाई करण्यात येईल. यामध्ये राष्ट्रीय उद्याने, जिल्हा स्तरांवर जंगले, ऐेतिहासिक वास्तू, स्मशानभूमी, दफनभूमी, जागतिक व राष्ट्रीय, स्थानिक ऐतिहासिक जागा, मंदिर, मस्जिद, चर्च, गुरुद्वार धार्मिकदृष्ट्या ठिकाणे परवानगी देण्यात येणार नाही.