जिल्हा रुग्णालयात दोन नव्याने कोरोना संशयित रुग्ण दाखल

आतापर्यंतचे तपासणी झालेले २८ जणांचे अहवाल निगेटिव्ह

जळगाव– जिल्हा रुग्णालयातील कोरोना संसर्ग कक्षात बुधवारी दोन नवीन संशयित रुग्ण दाखल झाले आहेत. यातील एक जामनेर तालुक्यातील ३१ वर्षीय तरुण तर दुसरा म्हसावद येथील २५ वर्षीय तरुण अाहे. आतापर्यंत जिल्ह्यात एकही कोरोना संशयित रुग्णांचे अहवाल पॉझिटिव्ह आढळून न आल्याने जिल्ह्यासाठी दिलासादायक बातमी आहे

जामनेर तालुक्यातील गोद्री येथील एकतीस वर्षीय तरुण पुण्याहून परतलेला आहे. पुण्यात तो कोरोना पॉसिटिव्ह रुग्णाच्या संपर्कात आला होता. गावी परतल्यावर कोरोना सदृश्य लक्षणे जाणवल्याने तो बुधवारी जिल्हा रुग्णालयात दाखल झाला. तर दुसरा म्हसावद येथील तरुण हा दिल्ली एअरपोर्टवर कामाला असून तोही गावी परतल्यावर त्याला सर्दी ताप खोकला जाणवल्याने बुधवारी जिल्हा रुग्णालयात दाखल झाला. दोघांचे नमुने घेण्यात असुन ते तपासणीसाठी पुण्याला पाठवण्यात आले आहेत.

२८ जणांचे तपासणी अहवाल निगेटिव्ह

जिल्हा रुग्णालयात आजपावेतो एकूण ३३ कोरोना संशयित रुग्ण दाखल झाले. त्यापैकी 28 जणांचे तपासणी अहवाल निगेटिव्ह आलेले असून तिघांचे अहवाल प्रतीक्षेत असल्याची माहिती शासकीय वैद्यकीय महाविद्यालयाचे अधिष्ठाता डॉ .भास्कर खैरे यांनी दिली. नागरिकांनी काळजी घेण्याचे आवाहन प्रशासनाने केले आहे