जिल्ह्यातील 800 डाकसेवक सातव्या वेतन आयोगसाठी बेमुदत संपावर

धुळे । ग्रा मीण डाक सेवकांना सातवा वेतन आयोग लागू करावा, याप्रमुख मागणींसाठी जिल्ह्यातील 800 डाकसेवक बेमुदत संपावर उतरले आहेत. शुक्रवारी डाकसेवकांच्या मागण्या निकाली काढण्यासाठी शहरातील मुख्य पोस्ट ऑफिससमोर ऑल इंडिया ग्रामीण डाक सेवक संघटनेतर्फे निदर्शने करण्यात आली. दरम्यान, या संपामुळे ग्रामीण भागातील डाक सेवा ठप्प झाली असून त्याचा फटका ग्रामस्थांना बसला
आहे.

सरकारने केले दुर्लक्ष
निवेदनात म्हटले आहे, की अखिल भारतीय ग्रामीण डाकसेवक संघटना 16 पासून बेमुदत संपावर उतरली आहे. अशा परिस्थितीत सरकार ग्रामीण डाक सेवकांच्या मागण्या सोडविण्यासाठी वेळकाढूपणा करीत आहे. यासंदर्भात सरकार दरबारी दोनदा बैठका झाल्या. परंतु, त्यातून काहीही निष्पन्न झाले नाही.नोटीस देऊनही उपयोग नाही बेमुदत संपावर उतरण्यासाठी एक महिन्यांपूर्वी नोटीस देण्यात आली होती. तरीही सरकारने दुर्लक्ष केल्यामुळे बेमुदत आंदोलन सुरू करण्यात आल्याचे ग्रामीण डाकसेवकांनी म्हटले आहे.

नागरिकांना त्रास
नागरिकांना त्रास होवू नये यासाठी सरकारला महिन्याभरापूर्वींच नोटीस देण्यात आली होती. परंतु, सरकारने डाकसेवकांच्या मागणीकडे दुर्लक्ष केले आहे. सरकार सोबत घेण्यात आलेल्या बैठकींमध्ये कोणताही तोडगा निघालेला नाही. बैठकींमध्ये योग्य तोडगा न निघाल्याने ग्रामीण डाकसेवकांनी बेमुदत संपाचे हत्यार उपसले आले. ग्रामीण डाकसेवक 16 पासून बेमुदत संपावर गेले असून शुक्रवार 18 रोजी मुख्य पोस्ट ऑफीस कार्यालयासमोर निदर्शने करण्यात आली.

घोषणाबाजीने दणाणला परिसर
शहरातील मुख्य पोस्ट ऑफिस कार्यालयासमोर शुक्रवारी सकाळी ग्रामीण डाकसेवकांनी निदर्शने करीत प्रलंबित मागण्या निकाली काढण्यासाठी घोषणाबाजी करून संपूर्ण परिसर दणाणून सोडला. यावेळी ऑल इंडिया ग्रामीण डाक सेवक संघटनेचे अध्यक्ष कॉ. एस. एल. बदामे, सचिव कॉ. एम. डी. अहिरे, आर. ई. देवरे, एन. एस. शेख, एल. यू. शिंदे, बी. बी. पालवे, आर. व्ही. खैरनार, जी. आय. खान, यू. डी. बोराडे आदी उपस्थित होते.