जुन्नरमधून तुळजाभवानी मातेच्या पलंगाचे प्रस्थान

जुन्नर । भंडारा, खोबर्‍याच्या उधळणीत, पारंपरिक वाद्याच्या गजरासह तुळजाभवानी मातेच्या जयघोषात तुळजापूरच्या भवानी मातेच्या पलंगाचे जुन्नरहून तुळजापूरकडे प्रस्थान झाले. भाविकांनी कधी डोक्यावर तर कधी हातावर पलंग उचलत 12 व्या शतकापासूनची परंपरा यंदाही जपली.

तिळवण तेली समाजाच्या कार्यालयापासून ही मिरवणूक काढण्यात आली. घोडेगाव येथून या पलंगाचे भाद्रपद पंचमीला (26 ऑगस्ट) जुन्नरमध्ये आगमन झाले होते. त्यांनतर भाद्रपद अष्टमी म्हणजेच 29 ऑगस्टला पलंगावर देवीच्या गादीची स्थापना करण्यात आली. घोडेगाव ते तुळजापूर या पायी प्रवासात फक्त जुन्नर येथे 10 दिवस पलंगाचा मुक्काम असतो. याचे औचित्य साधून भागवत कथा, पूजा, आरती, विविध धार्मिक कार्यक्रमांचे आयोजन करण्यात आले होते. पलंगाच्या प्रस्थानाच्या दिवशी शहरातील नागरिकांच्या घरी हा पलंग दर्शनासाठी नेण्यात आला. पलंगांच्या स्वागतासाठी जुन्नरवासीयांनी रस्त्यावर नवीन पायघड्या अंथरल्या होत्या. पूर्ण शहरातून पलंगाची मिरवणूक काढण्यात आली. तिळवण तेली समाजाचे अध्यक्ष राजेंद्र कर्पे, उपाध्यक्ष जयप्रकाश फल्ले, राजेंद्र खेत्री, नगरसेवक अविनाश करडीले, कैलास गरिबे आदींसह कार्यकर्ते, भाविक, मोठ्या संख्यने याप्रसंगी उपस्थितीत होते.