जुहू हिरोजला पराभवाचा धक्का

मुंबई । साई-मुंबई मास्टर्स प्रीमिअर लीगमध्ये आतापर्यंत धडाकेबाज कामगिरी करणार्‍या जुहू हिरोजला पहिल्यांदाच पराभवाचा सामना करावा लागला. प्रतिक पाटील आणि तेजस सोलंकी हे जुहू हिरोजचे दोन्ही सलामीवीर प्रथमच अपयशी ठरल्यामुळे जुहू हिरोजवर सांताक्रूझ क्रॅकर्सने 48 धावांनी मात केली. सांताक्रूझ क्रॅकर्सने नाणेफेक जिंकून प्रथम फलंदाजी करताना रोहन सदरजोशी आणि मिलिंद दरेकर यांच्या शतकी भागीदारीमुळे 18 षटकांत 6 बाद 173 धावा उभारल्या होत्या. मात्र, हे उद्दिष्ट गाठताना जुहू हिरोजचे दोन्ही सलामीवीर लवकरच माघारी परतले आणि त्यानंतर त्यांना विजयी लक्ष्य गाठता आले नाही. अमेय कोठावळे (3) आणि अमोल मोडक (14) या सलामीवारांना मोठी खेळी करण्यात अपयश आल्यामुळे सांताक्रूझ क्रॅकर्सची अवस्था 3.1 षटकांत 2 बाद 24 अशी झाली होती. त्यानंतर मात्र रोहन सदरजोशी आणि मिलिंद दरेकर यांनी सांताक्रूझच्या डावाला आकार दिला.

या दोघांनी अर्धशतकी खेळी करत सांताक्रूझला मजबूत स्थितीत आणून ठेवले. रोहनने 38 चेंडूंत 10 चौकारांसह 59 धावा फटकावल्या. मिलिंदने 35 चेंडूंत 4 चौकार आणि 3 षटकारांच्या मदतीने 54 धावांची खेळी केली. फलंदाजांच्या जोरावर आतापर्यंत तीन सामने जिंकणार्‍या जुहू हिरोजचे फलंदाज मात्र सांताक्रूझ क्रॅकर्सविरुद्धच्या सामन्यात अपयशी ठरले. एमएमपीएलमध्ये सर्वाधिक धावा फटकावणारा प्रतीक पाटील धावचीत झाला आणि जुहू हिरोजची पडझड सुरू झाली. त्यातच निखिल पागधरेने तीन विकेट्स मिळवत जुहूला धक्के दिले. त्यामुळे त्यांना 18 षटकांत 125 धावांपर्यंतच मजल मारता आली.