जेएनयुत ‘पाकिस्तान झिंदाबाद’च्या घोषणा दिलेल्या नाहीत; अहवालात स्पष्ट

नवी दिल्ली: जवाहरलाल नेहरु विद्यापीठात ‘पाकिस्तान झिंदाबाद’च्या घोषणा देण्यात आल्याचे आरोप होत होते. यावरून प्रकरणाची चौकशी करण्यात येत होती. दरम्यान जेएनयुमध्ये ‘पाकिस्तान झिंदाबाद’च्या घोषणा देण्यात आले नव्हते असा अहवाल दंडाधिकाऱ्यांनी दिला आहे. जेएनयु प्रकरणातील व्हिडीओत छेडछाड करण्यात आले होते असे अहवालात नमूद करण्यात आले आहे. हा अहवाल दिल्ली सरकारला आज सादर केला जाऊ शकतो. एकूण 25 पानांच्या या अहवालात जेएनयूमध्ये घडलेल्या घटनांचा क्रम देण्यात आलेला आहे.

एका वृत्तवाहिनीच्या पत्रकाराला अखिल भारतीय विद्यार्थी परिषदेला जेएनयूमधील कार्यक्रमासाठी बोलावले होते, अशी माहिती दंडाधिकाऱ्यांच्या अहवालात आहे. यामध्ये जेएनयूच्या एन्ट्री रजिस्टरचा उल्लेख आहे. संबंधित वृत्तवाहिनीनं या संदर्भातील व्हिडीओ आदेश देऊनही दंडाधिकाऱ्यांना सोपवला नाही, अशी माहिती सूत्रांनी दिली. टीव्हीवर दाखवण्यात आलेल्या आणि इंटरनेटवर व्हायरल झालेल्या जेएनयूमधील व्हिडीओंची फॉरेन्सिक चाचणी करण्यात आल्याची माहितीदेखील सूत्रांनी दिली.

या व्हिडीओंचा वापर पोलिसांकडून पुरावा म्हणून करण्यात येईलच याची खात्री देता नाही, अशी माहिती अहवालात आहे. यावरुन दिल्ली उच्च न्यायालयानं आपला निकाल राखून ठेवला आहे. देशद्रोह म्हणजे नेमका काय असतो हे तुम्हाला कळतं का?, असा सवाल यावेळी न्यायमूर्ती प्रतिभा रानी यांनी दिल्ली पोलिसांना विचारला. जेएनयू प्रकरणात विद्यार्थी संघटनेचा नेता कन्हैया कुमारला पोलिसांनी 12 फेब्रुवारीला अटक केली होती. त्याच्याविरोधात 124-अ (देशद्रोह) कलमांतर्गत गुन्हा दाखल करण्यात आला. 17 फेब्रुवारीपर्यंत तो पोलीस कोठडीत होता. त्यानंतर 2 मार्चपर्यंत त्याला न्यायालयीन कोठडी सुनावण्यात आली होती.