जो स्वत:च्या बापाचा झाला नाही, तो इतरांचा काय होणार?

लखनऊ । उत्तर प्रदेश विधानसभा निवडणुकीत समाजवादी पक्षाला मिळालेले अपयश पक्षाचे सुप्रिमो मुलायम सिंग यांच्या खूपच जिव्हारी लागलेले आहे. त्यामुळे नाराज झालेल्या मुलायमसिंग यादव यांनी मौन सोडताना एका जाहीर कार्यक्रमातून आपला मुलगा आणि राज्याचे माजी मुख्यमंत्री अखिलेश यादव याच्यावर जोरदार हल्लाबोल केला आहे. अखिलेशवर टीका करताना मुलायम सिंह यादव यांनी, जो स्वत: च्या बापाचा झाला नाही, तो इतरांचा काय होणार? असा सवाल उपस्थित करून जाहीर नाराजी व्यक्त केली आहे.

यावेळी बोलताना मुलायमसिंग यादव यांनी इतर नेत्यांचीही उदाहरणे दिली. ते म्हणाले की, अनेक नेते आपल्या मुलाला मुख्यमंत्री बनवत नाहीत. पण, मी या परंपरेला छेद देत, अखिलेशला मुख्यमंत्री केलं. अखिलेशसाठी मी इतका त्याग करूनही त्यानं मला काय दिलं? इतका अपमान आजपर्यंत माझा कुणीही केला नाही. त्यामुळे जो स्वत: च्या बापाचा होऊ शकला नाही, तो इतरांचा काय होणार? अशी टीका त्यांनी केली आहे.

वास्तविक, मुलायम सिंह यादव यांनी यापूर्वीही अखिलेशवर टीका केली आहे. मात्र, विधानसभा निवडणुकीत समाजवादी पक्षाच्या पराभवावर त्यांनी आज आपली जाहीर नाराजी व्यक्त केली. अखिलेश यादव आणि शिवपाल यादव यांच्यातील वादात मुलायम सिंह यादव यांनी पुन्हा एकदा आपला भाऊ शिवपाल यादव यांना साथ दिली आहे. शिवपाल यादव यांना पदावरून हटवून योग्य केलं नाही. कोणी आपल्या काकाशी असं वागू शकतं का? असं विचारत, अखिलेशने हे योग्य केलेले नाही असंही ते यावेळी म्हणाले.