ज्येष्ठांना बस भाड्यात सूट देण्याचा प्रस्ताव

मुंबई । मुंबई महानगरपालिकेचे अंगीकृत उपक्रम असलेल्या बेस्ट बसच्या तिकीट भाड्यामध्ये 50 टक्के सुट देणार असल्याचे महापौर विश्‍वनाथ महाडेश्‍वर यांनी घोषित केले होते. जेष्ठ नागरिक दिनानिमित्त आयोजित कार्यक्रमात महापौरांनी सदर घोषणा केली होती. महापौरांनी केलेली घोषणा लवकरच सत्यात उतरणार आहे. जेष्ठ नागरिकांना बसभाड्यात सुट देण्याचा प्रस्ताव पालिका सभागृहात सादर करण्यात आला आहे. एसटी महामंडळाच्या बसमधून प्रवास करताना जेष्ठ नागरिकांना बसभाड्यात 50 टक्के सवलत दिली जाते.

सवलतीमधून होणारा तोटा पालिका देणार
बेस्टमधून प्रवास करणार्‍या जेष्ठ नागरिकांच्या प्रवासी भाड्यात सुट दिल्यावर जी तफावत राहते ती तफावत पालिका भरून काढणार आहे. त्यासाठी बेस्टला दर महिन्याला केलेल्या खर्चाची बिले पालिकेला सादर करावी लागणार आहेत. या प्रस्तावाला स्थायी समितीची मंजुरी मिळाली आहे. हा प्रस्ताव अंतिम मंजुरीसाठी पालिका सभागृहात सादर करण्यात आला आहे. जागतिक ज्येष्ठ नागरिक दिन सोहळा आणि ज्येष्ठ नागरिकांचा सत्कार समारंभ माटुंग्याच्या यशवंत नाटय मंदिरात आयोजित करण्यात आला होता.