ज्येष्ठ अभिनेते अमोल पालेकर यांना ‘गोदावरी गौरव’ सन्मान

नाशिक । कुसुमाग्रज प्रतिष्ठानच्या गोदावरी गौरव पुरस्कारांची घोषणा प्रतिष्ठानचे अध्यक्ष मधु मंगेश कर्णिक यांनी शनिवारी नाशिकमध्ये केली. बॉलिवूडमधील ज्येष्ठ अभिनेते व दिग्दर्शक अमोल पालेकर यांना यंदाचा कुसुमाग्रज प्रतिष्ठानतर्फे देण्यात येणारा गोदावरी गौरव पुरस्कार जाहीर करण्यात आला आहे. 21 हजार रुपये रोख, सन्मानचिन्ह आणि मानपत्र असे या पुरस्काराचे स्वरुप आहे. पालेकर यांना नाट्य, सिनेमा क्षेत्रात तर गायक पंडित सत्यशील देशपांडे, माजी कुलगुरु डॉ. स्नेहलता देशमुख, चित्रकार सुभाष अवचट, समाजसेवक डॉ. रवींद्र आणि स्मिता कोल्हे, तसेच मुंबईतील कमला मिल दुर्घटनेत अडकलेल्यांना जीवदान देणारे सुदर्शन शिंदे व महेश साबळे यांनाही गोदा गौरव पुरस्कार देऊन त्यांच्या उल्लेखनिय कामगिरीबद्दल सन्मानित करण्यात येणार आहे.

यंदा पुरस्काराचे चौदावे वर्ष
10 मार्चला कुसुमाग्रजांच्या स्मृतीदिनी मविप्रच्या कर्मवीर रावसाहेब थोरात सभागृहात सायंकाळी 6 वाजता आयोजित सोहळ्यात पुरस्कारांचे वितरण करण्यात येणार आहे. 1992 पासून कुसुमाग्रज प्रतिष्ठानच्यावतीने विविध सहा प्रकारांमध्ये उल्लेखनिय कामगिरी बजावणार्‍या मान्यवरांना गोदावरी गौरवने सन्मानित केले जात आहे. यंदाचे पुरस्काराचे चौदावे वर्ष आहे. दर एक वर्षाआड या पुरस्काराचे वितरण होते.

तात्या साहेबांच्या गावीच पुरस्कारांची घोषणा
यापूर्वी, कुसुमाग्रज प्रतिष्ठानच्यावतीने देण्यात येणार्‍या जनस्थान आणि गोदावरी गौरव पुरस्कारांची घोषणा मुंबईत करण्याचा पायंडा विश्‍वस्तांनी पाडला होता. यंदा मात्र, तात्यासाहेबांच्या गावीच पुरस्कारांची घोषणा करण्याचे उशिराचे भान विश्‍वस्तांना आले. पत्रकार परिषदेप्रसंगी प्रतिष्ठानचे कार्यवाह मकरंद हिंगणे, विश्‍वस्त संजय पाटील, आमदार हेमंत टकले, लोकेश शेवडे, विश्‍वास ठाकूर, विनायक रानडे, अरविंद ओढेकर आदी उपस्थित होते.

यंदा थोरात सभागृहात वितरण
कुसुमाग्रज प्रतिष्ठानच्या जनस्थान अथवा गोदावरी गौरव या पुरस्कारांचे वितरण महाकवी कालिदास कलामंदिरात समारंभपूर्वक करण्यात येते. मात्र, सहा महिन्यांपासून कालिदास कलामंदिराचे नूतनीकरणाचे काम सुरू असल्याने यंदा मविप्र शिक्षण संस्थेच्या कर्मवीर रावसाहेब थोरात सभागृहात सायंकाळी 6 वाजता वितरण सोहळा होणार आहे.