झुकेरबर्गने कौतुक केलेल्या सॉफ्टवेअर इंजीनिअरची नाशिकमध्ये आत्महत्या

नाशिक : फेसबुकचे सर्वेसर्वा मार्क झुकेनबर्गकडून कौतुक झालेल्या नाशिकमधील आयटी तरुणाने राहत्या घरी आत्महत्या केल्याची खळबळजनक बातमी समोर आली. यामुळे नाशिकात एकच खळबळ उडाली आहे. झुकरबर्ग यांनी कौशलचे कौतुक केल्यामुळे तो प्रसिद्धीच्या झोतात आला होता. मात्र अचानक त्याने टोकाचे पाऊल उचलल्याने सर्वांना मोठा धक्का बसला आहे.

नाशिकच्या अशोका मार्ग परिसरातील अ‍ॅपल ईट सोसायटीमध्ये दुपारी तीन वाजण्याच्या सुमारास कौशलने गळफास घेतला. त्याचा भाऊ घरी आल्यानंतर हा प्रकार उघडकीस आला. कौशलच्या आत्महत्येचं कारण अद्याप समजू शकलेलं नाही. कौशल बाग नाशिकच्या के. के. वाघ कॉलेजमध्ये आयटीचे शिक्षण घेत होता. नाशिक कुंभमेळ्याच्या वेळी हेल्पिंग हँड्स नावाचे मोबाईल अ‍ॅप त्याने तयार केले होते. हरवलेल्या व्यक्तींचा शोध घेण्यासाठी हे अ‍ॅप उपयुक्त ठरत होते. या कार्यामुळे नाशिकचे पोलिस आयुक्त रविंद्र सिंघल यांनी कौशलचा जाहीर सत्कारही केला होता.

नाशिक पोलिस आयुक्तालयातर्फे आयोजित करण्यात आलेल्या पोलिस मॅरेथॉनचे ड्रोन कॅमेराच्या माध्यमातून कौशलने फेसबुक लाईव्ह केले होते. त्याबद्दल मार्क झुकरबर्गनंही कौशलचे कौतुक केले होते. कौशलच मृत्यूचे कारण अद्याप समजलेले नाही.