झोपडपट्टी पुनर्वसनावर दोन कोटीं खर्चास मंजुरी

विठ्ठलनगर प्रकल्पातील दोन इमारतींमध्ये विविध कामे होणार

पिंपरी-चिंचवड : झोपडपट्टी पुनर्वसन योजनेअंतर्गत पिंपरी, विठ्ठलनगर येथे राबविलेल्या प्रकल्पामधील ए-8 आणि ए-9 या दोन इमारतींमध्ये महापालिका स्थापत्य, विद्युत, पाणीपुरवठा व जलनि:सारण विषयक कामे करणार आहे. त्यासाठी दोन कोटी सात लाख रुपयांचा खर्च येणार आहे. याबाबतच्या प्रस्तावाला स्थायी समितीने मान्यता दिली.

स्थापत्य, विद्युत, पाणीपुरवठा कामे
झोपडपट्टी पुनर्वसन योजनेअंतर्गत पिंपरी-चिंचवड महापालिकेने शहरात झोपडपट्टी पुनर्वसन प्रकल्प राबविले आहेत. पिंपरीतील, विठ्ठलनगर येथे एक प्रकल्प राबविण्यात आला आहे. या प्रकल्पातील ए-8 आणि ए-9 या इमारतींमध्ये विविध कामे करण्यात येणार आहेत. त्यामध्ये स्थापत्य, विद्युत, पाणीपुरवठा व जलनि:सारणाची कामे करण्यात येणार आहेत. त्यासाठी दोन कोटी सात लाख रुपये खर्ची पडणार आहेत.

थरमॅक्स चौक रस्त्यासाठी 20 लाख
त्याचबरोबर टेल्को रस्त्यावरील थरमँक्स चौक ते केएसबी चौकापर्यंतच्या रस्त्याचे बी.सी पद्धतीने डांबरीकरण व स्थापत्य विषयक कामे करण्यात येणार आहेत. त्यासाठी चार कोटी 20 लाख रुपये खर्च येणार आहे. च-होली, डूडूळगाव येथील स्मशानभूमीची सुधारणा व स्थापत्य विषयक कामे करण्यात येणार आहेत. त्यासाठी दोन कोटी 8 लाख रुपये खर्च येणार आहे. भोसरीतील गवळीनगर मधील गवळी बंगला ते गवळी उद्यानापर्यंतचा 18 मीटर डीपी रस्त्यावर डांबरीकरण करण्यात येणार आहे. त्यासाठी 53 लाख रुपये खर्च येणार आहे.

बुद्धविहारमध्ये 71 लाखांचे उद्यान
दापोडी येथील मैलाशुद्धीकरण केंद्राची देखभाल करण्याचे काम मे.एच.एन.बी. इंजिनिअर्स प्रा. लि यांना देण्यात येणार आहे. त्यासाठी त्यांना दोन कोटी सात लाख रुपये खर्च येणार आहे. तसेच कासारवाडीतील मैलाशुद्धीकरण केंद्राच्या चालन, देखभाल व दुरुस्तीचे काम करण्यात येणार आहे. त्यासाठी दोन कोटी पाच लाख रुपये खर्च येणार आहे. पूर्वीच्या प्रभाग क्रमांक 61 मधील बुद्धविहार शेजारील मोकळ्या जागेत उद्यान विकसित करण्यात येणार आहे. त्यासाठी 71 लाख 68 हजार रुपयांचा खर्च येणार आहे. आकुर्डी गावठण, गंगानगर परिसरात जलनि:सारण नलिका सुधारक विषयक कामे करण्यात येणार आहेत. त्यासाठी 34 लाख रुपये खर्च येणार आहे.