टाकाऊ वस्तूंपासून बनविला ‘ऐतिहासिक महल‘!

चिंचवडगाव केशवनगरातील ‘भक्ती रेसिडेन्सी’ने दिला पर्यावरण रक्षणाचा संदेश

चिंचवड : येथील केशवनगर, काकडे पार्कमध्ये असलेल्या भक्ती रेसिडेन्सीत सालाबादाप्रमाणे यंदाही गणेशोत्सव साजरा केला जात आहे. यंदा मंडळाने कागद, लाकूड, थर्माकोल यासारख्या टाकाऊ वस्तूंचा वापर करत ‘ऐतिहासिक महल’ हा देखावा साकारला आहे. भक्ती रेसिडेन्सीचे गणेशोत्सवाचे यंदाचे दहावे आहे. पर्यावरणपूरक गणेशोत्सव साजरा करून पर्यावरण रक्षणाचा संदेश समाजात दिला जावा, या उद्देशाने हा देखावा साकारण्यात आला आहे. देखाव्यातील संपूर्ण डिझाईन व इतर कलाकूसर मंडळाच्या कार्यकर्त्यांनी स्वत: केले आहे. हा देखावा पाहण्यासाठी गणेशभक्तांची मोठी गर्दी होत आहे.

रक्तदान व दंतचिकित्सा शिबिर संपन्न
सामाजिक बांधिलकी जोपासण्याच्या उद्देशाने यंदा मंडळाच्या वतीने 27 रोजी रक्तदान व दंतचिकित्सा शिबिर आयोजित करण्यात आले होते. शिबिराचे उद्घाटन नगरसेवक राजेंद्र गावडे यांच्या हस्ते झाले. रक्तदान शिबिरासाठी विद्याश्री चॅरिटेबल ट्रस्ट तर दंतचिकित्सा शिबिरासाठी डॉ. डी. वाय. पाटील दंत महाविद्यालयाचे सहकार्य लाभले. या रक्तदान शिबिरात 56 बाटल्या रक्त संकलित झाले. त्याचप्रमाणे दंतचिकित्सा शिबिरात 130 जणांची तपासणी करण्यात आली. रक्तदान शिबिरास उत्तम प्रतिसाद लाभल्याने पिंपरी-चिंचवड रक्तपेढीतर्फे सोसायटीला पुरस्कार देऊन गौरविण्यात आले.

संयोजनात यांचा हातभार
या उपक्रमाच्या यशस्वीतेसाठी मंडळाचे अध्यक्ष रितेश भुसारी, उपाध्यक्ष श्रेयस बाबू, खजिनदार अभिजित जाधव, कार्यकर्ते निखिल जाधव, विवेक पालांडे, विनोद खोत, सौरभ फाटक, सार्थक शूल, अनिकेत खोत, आमिर तांबोळी, संकेत यादव, अंकूर शहा, रुपेश मगर, शुभम चव्हाण, अनिकेत पाटील, शुभम सस्ते, विनायक कुरी, योगेश अपिष्टे, संजय लोंढे, नकूल लोंढे, अनिरुद्ध पाटील यांनी परिश्रम घेतले.