टेनिसपटूंना मिळणार शास्त्रोक्त प्रशिक्षण; पाच कोर्ट चालवायला देणार

पिंपरी : पिंपरी-चिंचवड महापालिकेच्यावतीने शहराच्या विविध भागांत दहा लॉन टेनिस कोर्ट चालविली जातात. त्यापैकी पाच ठिकाणी भारतीय टेनिस टिमचे प्रशिक्षक नंदन बाळ हे शहरातील 50 खेळाडूंना टेनिसचे शास्त्रोक्तव प्रशिक्षण देणार आहेत. याबाबतचा प्रस्ताव शनिवारी झालेल्या महासभेसमोर आयत्यावेळी दाखल करुन घेण्यात आला आहे. पिंपरी-चिंचवड महापालिकेची जानेवारी महिन्यातील सर्व साधारण सभा शनिवारी आयोजित केली होती. महापौर राहुल जाधव सभेच्या अध्यक्षस्थानी होते. विधानपरिषदेचे माजी सभापती शिवाजीराव देशमुख, माजी न्यायमूर्ती चंद्रशेखर धर्माधिकारी, विश्‍व हिंदू परिषदेचे माजी प्रमुख विष्णू हरी दालमिया, क्रीडा प्रशिक्षक रमाकांत आचरेकर यांना श्रद्धांजली वाहून सभा 4 फेब्रुवारीपर्यंत तहकूब करण्यात आली आहे.

महापालिकेच्या क्रीडा विभागाअंतर्गत शहराच्या विविध दहा ठिकाणी टेनिस कोर्ट चालविली जातात. यामध्ये निगडी प्राधिकरणातील गणेश तलावानजीक आणि बाहुबली व्यायामशाळेजवळ सेक्टलर क्रमांक 25 तर सेक्टर क्रमांक 26 मध्ये नेताजी सुभाषचंद्र बोस टेनिस कोर्ट चालविली जातात. तसेच चिंचवडगाव, मोहननगर, इंद्रायणीनगर येथील संत ज्ञानेश्‍व र क्रीडा संकूल, मोशी प्राधिकरण स्पाईनरोड येथील सेक्ट्र क्रमांक 4, महात्मा फुलेनगर, कासारवाडी आणि सांगवी अशा एकूण दहा ठिकाणी ही सुविधा उपलब्ध करुन देण्यात आली आहे. मात्र अशिया खंडातील सर्वात श्रीमंत महापालिका असलेल्या पिंपरी पालिकेला या दहा ठिकाणी प्रशिक्षक नेमणे शक्य नाही. त्यामुळे ज्या खेळाडूंना सराव करायचा आहे, ते सर्वजण वर्गणी काढून प्रशिक्षकाकडून टेनिसचे धडे गिरवत आहेत. त्यामुळे लॉन टेनिस प्रशिक्षण केंद्र सुरु करणे महत्त्वाचे असल्याचे महापालिका आयुक्तळ श्रावण हर्डीकर यांचे मत बनले आहे. भारतीय टेनिस संघाचे प्रशिक्षक असलेले नंदनबाळ टेनिसेचे धडे देणारी क्रीडा संस्था चालवतात. शहरातील दहा टेनिस कोर्टपैकी मोहननगर, प्राधिकरण, चिंचवडगाव तसेच इंद्रायणीनगरमधील संत ज्ञानेश्‍वर क्रीडा संकूल आणि महात्मा फुलेनगर या पाच ठिकाणी हे प्रशिक्षण दिले जाणार आहे.

महापालिका शाळांमधील इयत्ता पाचवी ते दहावीतील एकूण 50 विद्यार्थ्यांना टेनिस क्रीडा प्रकारातील बेसिक, इंटरमिडीएट आणि ऍडव्हान्स हे तीन प्रकारचे प्रशिक्षण केवळ दरमहा 100 रुपये प्रशिक्षण शुल्क आकारून देणे बंधनकारक आहे. या सर्व खेळाडूंना रॅकेट, शूज आणि किट महापालिकेच्या क्रीडा विभागाकडून पुरविण्यात येणार आहे. मात्र, अन्य विद्यार्थी खेळाडूंकडून बेसिक ट्रेनिंगसाठी दीड हजार रुपये, इंटरमिडीएटसाठी अडीच हजार रूपये तर ऍडव्हान्स ट्रेनिंगसाठी साडे तीन हजार रुपये शुल्क आकारणीस महापालिका प्रशासनाकडून परवानगी दिली जाणार आहे. याकरिता महापालिकेकडून या संस्थेच्या प्रशिक्षकांना कोणतेही मानधन दिले जाणार नसून, ती जबाबदारी संस्थेची असणार आहे.