ट्रकच्या अपघातात वढवे येथील दुचाकीस्वार ठार

बोहर्डी फाट्यावर भरधाव बाराचाकी ट्रकने दुचाकीला मारला कट ; वढवे गावात शोककळा ; ट्रक चालकाविरुद्ध वरणगाव पोलिसात गुन्हा

वरणगाव- बोहर्डी फाट्यावर बारा चाकी ट्रकने दुचाकीला धडक दिल्याने वढवे येथील युवक ठार झाल्याची घटना मंगळवारी रात्री 8 . 30 वाजेच्या सुमारास राष्ट्रीय महार्गावरील बोहर्डी फाट्याजवळ घडली. ट्रकचालकाविरूध्द वरणगाव पोलिसात गुन्हा दाखल करण्यात आला. ज्ञानेश्वर कडू पाटील (44, वढवे, ता. मुक्ताईनगर) असे मयत दुचाकीस्वाराचे नाव आहे. पाटील हे दुचाकी (क्रमांक एम.एच 19 ए.यु.1475) ने वरणगाव येथे बाजारासाठी आले होते. बाजार आटोपून ते सायंकाळी घराकडे निघाले असतानाच बोहर्डी फाट्यावर मुक्ताईनगरकडून येणारी बाराचाकी ट्रक (क्रमांक एम.एच.40 ए.के.6855) न ओव्हरटेकच्या प्रयत्नात धडक दिल्याने पाटील हे गंभीर जखमी झाले. ग्रामस्थांनी त्यांना वरणगाव ग्रामीण रुग्णालयात उपचारार्थ आणले असता वैद्यकीय अधिकार्‍यानी मृत घोषीत केले. प्रमोद पंढरी पाटील यांच्या फिर्यादीवरुन वरणगाव पोलिसात ट्रक चालकाविरूध्द गुन्हा दाखल करण्यात आला. दरम्यान, मयत पाटील हे वीज कंपनीत गेल्या 15 वर्षापासून ठेकेदारी पध्दतीने कामाला होते. त्यांच्या पश्चात पत्नी, मुलगा, मुलगी असा परीवार आहे.