ट्रकच्या धडकेत साकळीचा दुचाकीस्वार ठार

यावल- बर्‍हाणपूर-अंकलेश्वर राज्य मार्गावर मंगरूळ (ता.चोपडा) फाट्याजवळ दुचाकी व ट्रकच्या अपघातात साकळीच्या तरुणाचा मृत्यू झाला तर त्याचा सोबतचा मित्र गंभीर जखमी झाल्याची घटना सोमवारी घडली. यशवंत लक्ष्मण वाघळे (25, साकळी) असे मृत तरुणाचे नाव आहे. अपघाताचे वृत्त साकळीत समजताच अनेकांनी चोपडा येथे कुटीर रूग्णालयात धाव घेतली. साकळी (ता.यावल) येथील रहिवासी यशवंत उर्फ धर्मा लक्ष्मण वाघळे-धोबी व त्याचा मित्र विक्रम देविदास जाधव-कैकाडी (20) हे दोघे दुचाकी (एम. एच. 19 ए. डी. 4171) वरून चोपड्याकडे जात असताना मंगरूळ (ता.चोपडा) फाट्याजवळ भरधाव अज्ञात मालवाहू वाहनाने दुचाकीला जोरदार धडक दिली. अपघातात यशवंतचा जागीच मृत्यू झाला तर विक्रम गंभीर जखमी झाला. विक्रमचा उजवा पाय मोडला आहे. दोघांना घटनास्थळावरून चोपडा येथील कुटीर रुग्णालयात हलविण्यात आले. अपघाताचे वृत्त साकळीत समजता अनेकांनी रुग्णालयात धाव घेतली. गंभीर जखमी झालेल्या विक्रम याला पुढील उपचारासाठी जळगाव जिल्हा शासकिय वैद्यकिय महाविद्यालयात हलवण्यात आले. यशवंत उर्फ धर्मा वाघळे याच्या पश्चात पत्नी, साडेचार वर्षाची मुलगी, अडीच वर्षाचा मुलगा, आई, वडील, भाऊ असा परीवार आहे.