ट्रकमधील साहित्याची चोरी : 19 लाखांच्या मुद्देमालासह दोघे जाळ्यात

जळगाव : ट्रकमधून साहित्याची चोरी करणार्‍या दोघांच्या स्थानिक गुन्हे शाखेच्या पथकाने शुक्रवारी मुसक्या आवळल्या असून दोघांकडून सुमारे 19 लाख रुपयांचा मुद्देमाल हस्तगत करण्यात आला आहे. इकबाल उर्फ इकबाल टेलर अन्वर पटेल (48, रा.रजा कॉलनी, शेरा चौक, जळगाव) व मोबीन अहमद पटेल (47, रा.भादली, ह.मु. कोंढवा, पुणे) अशी अटकेतील आरोपींची नावे आहेत. दरम्यान, आरोपींनी एमआयडीसी व पहूर पोलिस ठाणे हद्दीत झालेल्या ट्रकमधील साहित्याच्या चोरीची कबुली दिली आहे.

एका आरोपीकडून दहा लाखांचे साहित्य जप्त
ट्रकमधील साहित्य चोरीच्या पोलिस अधीक्षकांनी चौकशी करण्याच्या सूचना स्थानिक गुन्हे शाखेला दिल्या नंतर पोलिस निरीक्षक किरणकुमार बकाले यांनी पथके रवाना केली हेाती. पथकाला पहूर पोलिस ठाण्यात दाखल असलेल्या गुन्ह्यातील संशयीत आरोपी मोबीन अहमद पटेल (47, रा.भादली) हा कोंढवा, पुणे येथे राहत असल्याची माहिती मिळताच पथकाने पुणे येथे जावून गुरुवारी संशयीताला ताब्यात घेतले. त्याच्याकडून सुमारे 10 लाख रुपये किंमतीचा मुद्देमाल हस्तगत करण्यात आला.

दुसर्‍या संशयीताकडून नऊ लाखांचा मुद्देमाल हस्तगत
ट्रकमधील साहित्याची चोरी केल्यानंतर मोबीन अहमद पटेल याने तो माल त्याचा ओळखीचा इकबाल उर्फ इकबाल टेलर अन्वर पटेल (48, रा.रजा कॉलनी, शेरा चौक, जळगाव) यांना विकल्याचे चौकशीत समोर आाल्यानंतर संशयीत आरोपी इकबाल अन्वर पटेल याला शुक्रवारी अटक करण्यात आली व त्याच्याकडून सुमारे नऊ लाख रुपये किंमतीचा मुद्देमाल हस्तगत करण्यात आला.

एमआयडीसी हद्दीतील चोरीची कबुली
या घटनेत दोघा संशयीत आरोपींकडून सुमारे 19 लाख रुपयांचा मुद्देमाल हस्तगत करण्यात आला असून त्यांना अटक करण्यात आली. त्या दोघ संशयीतांना पहुर पोलिसांच्या स्वाधीन करण्यात आले तसेच यातील संशयीत आरोपी इकबाल उर्फ इकबाल टेलर अन्वर पटेल याची कसून चौकशी केली असता त्याने एमआयडीसीत केलेल्या चोरीचीदेखील कबुली दिली.