ट्रक-टँकर अपघातात गॅसगळती

शहापूरजवळील कांबारे येथे घडला अपघात

शहापूर : ठाणे-मुंबई-नाशिक महामार्गावर हायड्रोजन गॅसची वाहतूक करणार्‍या टँकरला अपघात झाल्याने सोमवारी पहाटे महामार्गावर गॅस गळती सुरू झाली. त्यामुळे या महामार्गावरील वाहनचालकांत भीतीचे वातावरण पसरले होते. त्यानंतर शहापूर पोलिसांनी गळती होणारा वायू ज्वलनशील नसल्याची खात्री करून महामार्गावरील वाहतूक सुरू केली आहे. शहापूरजवळील कांबारे येथे ट्रक आणि टँकरची धडक झाल्याने हा अपघात झाला.

हायड्रोजन गॅसची गळती
अपघातग्रस्त टँकर हा अलिबागहून मुरबाडच्या टेक्नोक्राफ्ट कारखान्यात हायड्रोजन वायू घेऊन निघाला होता. त्यावेळी हा टँकर मुंबई-नाशिक महामार्गावरील शहापूर येथील एका जवळील वळणावर वळण घेत असताना नाशिकहून मुंबईच्या दिशेने लसूण घेऊन जाणार्‍या ट्रकला धडकल्याने हा अपघात झाला. त्यामुळे दोन्ही वाहने पलटी झाली. त्यावेळी टँकरमधून हायड्रोजन गॅसची गळती सुरू झाली. या अपघातामुळे टँकरमधून गॅस गळती सुरू झाल्याने महामार्गावरील वाहनचालक व प्रवाशांमध्ये भीतीचे वातावरण निर्माण झाले होते. त्यामुळे महामार्गावर काही काळ वाहतूककोंडी निर्माण झाली.

रहिवाशांमध्ये घबराटीचे वातावरण
या घटनेची माहिती मिळताच परांजपे नगर येथे राहणारे शहापूरचे आमदार पांडुरंग बरोरा यांनी प्रसंगावधान दाखवून तातडीने घटनास्थळी धाव घेतली. त्यानंतर संपूर्ण परिस्थिती पाहिली. त्यानंतर तातडीने शहापूर पोलीस निरीक्षक, उपविभागीय पोलीस अधिकारी शहापूर, यांना फोन केले. त्यानंतर महामार्ग पोलिसांच्या सोबत उभे राहून वाहतूक बंद करण्यासाठी त्यांना मदत केली. त्यानंतर परिसरातील इमारतीमधील रहिवाश्यांना बाहेर काढण्यासाठी आमदारांनी स्वतः फोन केले. हा गॅस परांजपे नगर परिसरात पसरल्यामुळे नागरिकांमध्ये घबराट निर्माण झाली होती. परंतु हा गॅस ज्वलनशील नसल्याने मोठा अनर्थ टळला.

जखमींवर उपचार सुरु
या अपघाताची माहिती मिळताच महामार्ग पोलिसांनी तत्काळ अपघातस्थळी धाव घेतली व गळती होणारा गॅस धोकादायक आहे का याची खात्री केली. त्यानंतर तो ज्वलनशील अथवा विषारी वायू नसल्याची खात्री होताच महामार्गावरील वाहतूक पूर्ववत केली आहे. अपघातामध्ये टँकरचालक जगदीश शंकर केळकर (42) व हैदर अली (40) असे दोघेजण गंभीर जखमी झाले आहेत. त्यांच्यावर शहापूर उपजिल्हा रुग्णालयात उपचार सुरू आहेत.