ट्रम्प यांचा दौरा भारतासाठी फलदायी: संरक्षण कराराची घोषणा !
नवी दिल्ली: अमेरिकेचे अध्यक्ष डोनाल्ड ट्रम्प कालपासून दोन दिवशीय भारत दौऱ्यावर आहेत. आज त्यांचा दौऱ्याचा शेवटचा दिवस आहे. भारत आणि अमेरिकेचे संबंध दृढ करण्याच्या दृष्टीने या दौऱ्याकडे विशेष लक्ष लागले आहे. अखेर दीर्घ चर्चा आणि वाटाघाटीनंतर ट्रम्प यांनी दोन्ही देशांमधील ३ अब्ज डॉलर्सच्या संरक्षण कराराची घोषणा केली. पाकिस्तानने चालवलेल्या दहशतवादाला लगाम घालण्याची गरज असल्याचे ट्रम्प म्हणाले.
या करारात अमेरिकेकडून २४ एमएच६० रोमियो हेलिकॉप्टरची २.६ अब्ज अमेरिकी डॉलर्स इतक्या किंमतीत खरेदी करण्यात येणार आहे. आणखी एक करार हा सहा एएच ६४ई अपाचे हेलिकॉप्टरबाबतचा आहे. या करारांतर्गत ८० कोटी डॉलर्सची खरेदी करण्यात येणार आहे. ३ अब्ज डॉलर्सहून अधिकच्या या संरक्षण करारामुळे दोन्ही देशांदरम्यानचे संबंध अधिक मजबूत होतील, असा विश्वास ट्रम्प यांनी यावेळी व्यक्त केला.
आम्ही भारत आणि अमेरिका भागीदारीबाबतच्या महत्त्वाच्या मुद्द्यांवर चर्चा केली. यात संरक्षण आणि सुरक्षेचा समावेश आहे, असे पंतप्रधान मोदी यांनी माहिती देताना सांगितले. आम्ही ऊर्जा धोरणात्मक भागीदारी, व्यापार आणि पिपल-टू-पिपल अशा महत्त्वाच्या मुद्द्यांवर चर्चा केल्याचे मोदी म्हणाले. संरक्षण क्षेत्रामध्ये भारत-अमेरिकेदरम्यान मजबूत होत असलेले संबंध आमच्या भागीदारीचा अत्यंत महत्त्वाचा भाग आहे, असेही मोदी म्हणाले.