ट्रॅक्टर चालकास न्यायालयीन कोठडी

जळगाव । निमखेडी रस्त्यावरील हिराशिवा कॉलनीतील गजानन सलून समोर रविवारी सकाळी 8 वाजेच्या सुमारास वाळूची अवैध वाहतूक करणार्‍या ट्रॅक्टर चालकाने तलाठ्याच्या अंगावर ट्रॅक्टर घालून ठार मारण्याचा प्रयत्न केला. या प्रकरणी तालुका पोलिसांनी ट्रॅक्टर चालकाला अटक केली होती. त्याला सोमवारी प्रथमवर्ग न्यायदंडाधिकारी एम. एम. चौधरी यांच्या न्यायालयात हजर केले असता त्यांनी न्यायालयीन कोठडी सुनावली आहे. आव्हाणे मार्गे निमखेडी रस्त्यावरून ट्रॅक्टरने अवैधरित्या वाळूची वाहतूक करणार्‍या ट्रॅक्टरला तलाठी मनोहर शिवराम बाविस्कर यांनी अडविले होते. त्यावेळी ट्रॅक्टरचा (क्र. एमएच-19-एपी-9407) चालक संजय राजेंद्र राठोड याने बाविस्कर यांच्याशी अरेरावी केली. त्यानंतर संजय राठोड याने ट्रॅक्टर अंगावर घालून बाविस्कर यांना जीवेठार मारण्याचा प्रयत्न केला. या प्रकरणी बाविस्कर यांनी दिलेल्या फिर्यादीवरून तालुका पोलिस ठाण्यात गुन्हा दाखल करण्यात आला होता. पोलिसांनी संजय राठोड याला अटक करून सोमवारी न्यायाधीश चौधरी यांच्या न्यायालयात हजर केले असता त्यांनी न्यायालयीन कोठडी सुनावली आहे.