ट्विटरवरुन सेहवागने कमावले तब्बल 30 लाख रुपये!

मुंबई : भारतीय संघाचा माजी धडाकेबाज फलंदाज आपल्या ट्वीटर अकाऊंटवर देखील धडाकेबाज काम करत आहे. मात्र या कामातून देखील तो अर्थार्जन करत असल्याची माहिती त्याने स्वता दिली आहे. ‘हिंदुस्तान टाइम्स’ला दिलेल्या मुलाखतीत सेहवागने ट्विटरवरील कमाईबाबत सांगितले. ट्विटरवर अॅक्टिव्ह असल्यामुळे गेल्या सहा महिन्यात मी 30 लाख रुपये कमावले आहेत, असे सेहवागने म्हटले आहे.

वीरु के फंडे नावाचे यू-ट्यूब चॅनेल
क्रिकेट असो वा ट्विटर सेहवागने दोन्ही मैदाने गाजवली आहेत. त्यामुळेच सेहवागचे 80 लाखांहून अधिक फॉलोअर्स आहेत. टीम इंडियाचा माजी धडाकेबाज फलंदाज वीरेंद्र सेहवाग सोशल नेटवर्किंग साईट ट्विटरवर हटके ट्विटसाठी प्रसिद्ध आहे. कुणाला हटके शुभेच्छा, कुणाची टर उडवण्यासाठी तर कुणाला मदत करण्याबाबत सेहवागचे ट्विट प्रसिद्ध आहेत.

त्यामुळेच सेहवागचे लाखो फॉलोअर्स त्याचे ट्विट रिट्विट आणि लाईक्स करतात. मात्र याच ट्विटरने सेहवागला बक्कळ कमाईही करुन दिली आहे. सेहवाग सध्या कॉमेंटेटर म्हणूनही अनेक किस्से सांगताना दिसत आहे. इतकंच नाही तर सेहवागने वीरु के फंडे नावाचे यू-ट्यूब चॅनेलही सुरु केले आहे. इथे सेहवागचे खास व्हिडीओ पाहायला मिळतात.

धोनीच्या चुकीच्या फोटोसाठी वीरूने झापले
टीम इंडियाचा कॅप्टन कूल महेंद्र सिंह धोनीने कर्णधारपदाचा राजीनामा दिला आणि फक्त भारतच नाही, तर जगभरात चर्चांना सुरुवात झाली. उत्साहाच्या भरात यूएईमधल्या एका ऑनलाईन न्यूज एजन्सीने धोनी ऐवजी सुशांत सिंग राजपूतचा फोटो टाकला आणि हाच मुद्दा धरत सेहवागने नेहमीप्रमाणे ट्विटरवर फिरकी घेतली. एमिरेट्स247.कॉम या ऑनलाईन न्यूज एजन्सीने धोनीच्या राजीनाम्याच्या वृत्तासोबत फोटो देताना घोळ घातला. उत्साहाच्या भरात रिअल लाईफ धोनी ऐवजी रील लाईफमध्ये म्हणजेच ‘एमएस धोनी’ चित्रपटात त्याची भूमिका साकारणाऱ्या सुशांत सिंग राजपूतचा फोटो पोस्ट केला. अर्थात ही पोस्ट नंतर डिलीट करण्यात आली. एमिरेट्स न्यूजला टॅग करत असा ट्वीट केला. ‘मी तुमच्यासोबत विमान प्रवास करतोय’, असा टोला हाणत सेहवागने त्याच्या चेहऱ्याशी साधर्म्य असलेल्या एका व्यक्तीचा फोटो पोस्ट केला. ‘मला आशा आहे, तुम्ही माझ्याऐवजी याला विमानात प्रवेश नाही देणार’ असा तिरकस निशाणा सेहवागने लगावला. एमिरेट्स न्यूज एजन्सीला टॅग करुनही विरुने केलेली तिरकस कमेंट ‘एमिरेट्स एअरलाईन्स’ला मात्र झेपली नाही. कदाचित सेहवागच्या ट्वीट्सची सवय नसल्याने एमिरेट्स एअरलाईन्सने त्याचं स्वागतच केले. सेहवागचा (खरा) फोटो टाकत, आमचा घोळ होणार नाही सोबत फ्लाईट घेण्यास उत्सुक आहोत, अशा आशयाचे ट्वीट त्यांनी केले.