ट्विटरवर सेहवाग-टेलरची मस्ती

नवी दिल्ली । भारत आणि न्यूझीलंड यांच्यातील शेवटचा टी-20 क्रिकेट सामना भारताने जिंकत मालिकाही खिशात टाकली. शेवटच्या टी-20 सामन्यामध्ये भारताने न्यूझीलंडचा 6 धावांनी पराभव करत मालिका 2-1 अशा फरकाने जिंकली. ही मालिका संपल्यानंतर न्यूझीलंडचा फलंदाज रॉस टेलर आणि भारताचा माजी क्रिकेटपटू वीरेंद्र सेहवाग यांच्यामधली ट्विटरवरची मस्तीही संपुष्टात आली आहे. हिंदीमधून ट्विट करायला ज्यांनी मदत केली, त्यांची नाव टेलरने आता उघड केली आहेत.पहिल्या एकदिवसीय सामन्यानंतर टेलर आणि सेहवागमध्ये ट्विटर युद्ध सुरू झालं. पहिल्या एकदिवसीय सामन्यामध्ये रॉस टेलरने शानदार कामगिरी केली होती. खूप चांगला खेळलास रॉस टेलर, दर्जी जी, असे ट्विट सेहवागने केले होते.

सेहवागच्या ट्विटवर मग टेलरने हिंदीतून प्रतिक्रिया दिली. शुक्रिया वीरेंद्र सहवाग भाई, अगली बार अपना ऑर्डर समय पर भेज देना ताकि मैं आपको अगली दिवाली के पहले भेज दूं.. हैप्पी दिवाली, असं ट्विट टेलरने केले.या हिंदीतल्या ट्विटबाबत आता रॉस टेलरने स्पष्टीकरण दिले आहे. इन्स्टाग्राम अकाऊंटवर फोटो शेअर करून टेलरनं हे गुपित उलगडवले आहे. देव आणि न्यूझीलंडचा खेळाडू ईश सोदी यांच्या मदतीने आपण हिंदीत ट्विट केल्याचे टेलरने इस्टाग्रामवरून सांगितले आहे. शिलाई आणि धुलाई पुढच्या काळात सुरुच राहिल, असेही टेलर म्हणालाय. टेलरच्या या हिंदीतल्या ट्विटवर सेहवागलाही आवडली होती. टेलरने आधार कार्ड काढावे, असे आवाहन सेहवागने केले होते. सेहवागच्या या आवाहनाला आधार कार्डच्या ट्विटर हँडलवरूनही उत्तर देण्यात आले होते. टेलर आणि सेहवागची ही जुगलबंदी ट्विटरवर अनेक चाहत्यांनी रिट्विट केली होती.