ठाण्यात बेकायदा पार्किंगपासून दिलासा

ठाणे । बेकायदा पार्किंगमुळे ठाणे रेल्वे स्थानकातून नागरिकांना येजा करणे अवघड झाले होते. या समस्येवर वारंवार मागणी केल्यानंतर अखेर पोलिसांनी कारवाई सुरु केल्याने प्रवाशांना दिलासा मिळाला आहे. ठाणे रेल्वे स्थानक परिसरात गेल्या दोन महिन्यांपासून होणार्‍या बेकायदा दुचाकी पार्किंगवर अखेर ठाणे वाहतूक पोलिसांनी शनिवारी कारवाई केली. गेल्या दोन महिन्यांपासून येथे बेकायदा पार्किंगचा सुळसुळाट सुरू होता. स्थानक परिसरातून ये-जा करणार्‍या प्रवाशांना बेकायदेशीर पार्किंगमुळे अडचणींचा सामना करावा लागत होता. या बेकायदा पार्किंगवर कारवाई झाल्याने अखेर प्रवाशांना दिलासा मिळाला आहे.

ठाणे वाहतूक शाखेची रेल्वेच्या मदतीने कारवाई
एल्फिन्स्टन रेल्वे स्थानकात झालेल्या दुर्घटनेनंतर मनसेच्या कार्यकर्त्यांनी रेल्वे स्थानक परिसरातील फेरीवाल्यांना पिटाळून लावले. मात्र, त्यानंतर या मोकळ्या जागेत बेकायदा पार्किंगचा सुळसुळाट सुरू झाला होता. त्यामुळे ठाणे रेल्वे स्थानकातून प्रवास करणार्‍या लाखो प्रवाशांना त्याचा त्रास सहन करावा लागत होता. ठाणे रेल्वे स्थानकातील फलाट क्रमांक एक आणि दोनच्या बाजूला गेल्या दोन महिन्यांपासून बेकायदेशीररीत्या दुचाकी उभ्या करण्यात येत होत्या. त्यातील अनेक दुचाकी या पोलिसांचे स्टीकर असलेल्या होत्या. या बेकायदेशीरपणे उभ्या करण्यात येणार्‍या दुचाकींवर ठाणे वाहतूक शाखेने ठाणे रेल्वे स्थानकाचे संचालक आणि रेल्वे सुरक्षा दलाच्या मदतीने कारवाई केली.