डिजिटल व्यवहारावर कॅशबॅक

नवी दिल्ली : डिजिटल व्यवहार केल्यास किंवा डिजिटल व्यवहार करण्यासाठी इतरांना प्रोस्ताहित केल्यास सरकारकडून कॅशबॅक देण्यात येणार आहे. डिजिटल व्यवहारांना चालना देण्यासाठी सरकारकडून सुमारे 150 ते 250 रुपयांपर्यंतचे कॅशबॅक दिले जाऊ शकते. 14 एप्रिलला नागपुरात पंतप्रधान नरेंद्र मोदी डिजिटल मेळाव्यात या दोन नव्या योजनांचा शुभारंभ करण्याची शक्यता आहे.

सरकारचे भीम अ‍ॅप, आधार अनबेल पेमेंट याव्दारेच व्यवहार केल्यास सरकारकडून कॅशबॅक देण्यात येईल. खासगी कंपन्यांचे अ‍ॅप किंवा बँकांच्या अ‍ॅपवरुन केलेल्या व्यवहारांवर सरकारकडून कॅशबॅक दिले जाणार नाही. लोकांनी अधिकाधिक डिजिटल व्यवहार करावेत, कॅशलेस व्यवहारांना प्राधान्य मिळावे, यासाठी या योजना सुरु करण्यात येणार आहेत. दुसर्‍या डिजिटल योजनेनुसार एखाद्या नातेवाईकाला अथवा मित्राला सरकारच्या डिजिटल माध्यमांतून व्यवहार करण्यासाठी प्रोत्साहित केल्यास 30 रुपयांचे अतिरिक्त कॅशबॅक मिळणार आहे. तसेच कॅशबॅकची ही रक्कम व्यवहारांच्या संख्येवर ठरणार आहे.