डीएसकेंचा मुक्काम ससूनमध्ये!

वैद्यकीय अहवाल न्यायालयाला सादर करणार

पुणे : गुंतवणूकदारांची फसवणूक केल्याप्रकरणी कोठडीत असलेले पुण्यातील बांधकाम व्यावसायिक डी. एस. कुलकर्णी यांना उपचारासाठी पुढील 48 तास ससून रूग्णालयातच ठेवले जाणार आहे. त्यानंतर त्यांच्या प्रकृतीचा आढावा घेऊन वैद्यकीय अहवाल न्यायालयाला सादर करण्यात येणार आहे. डीएसकेंच्या वैद्यकीय तपासणीवरील बैठकीत हा निर्णय घेण्यात आला. डीएसकेंना 23 फेब्रुवारीपर्यंत पोलिस कोठडी सुनावण्यात आली होती. मात्र, त्यांची प्रकृती बिघडल्याने पोलिस कोठडीचे रूपांतर न्यायालयीन कोठडीत करण्यात आले होते. प्रकृतीच्या कारणामुळे आता पुढील 48 तास डीएसकेंचा ससूनमध्येच मुक्काम असणार आहे.

10 डॉक्टरांकडून तपासणी
पोलिस कोठडीत पडल्याने डीएसके यांना ससून रूग्णालयात उपचारासाठी हलविण्यात आले होते. मात्र योग्य सुविधा नसल्याने त्यांना पुढील उपचारासाठी खासगी रूग्णालयात दाखल करण्याची त्यांच्या वकिलाने न्यायालयाकडे परवानगी मागितली होती. त्यानुसार डीएसकेंना दीनानाथ रूग्णालयात हलवण्यात आले होते. मंगळवारी त्यांच्या वैद्यकीय तपासणीवर बैठक घेण्यात आली. बैठकीत डीएसकेंना पुढील 48 तास ससून रूग्णालयातच उपचारांसाठी ठेवण्याबाबत निर्णय घेण्यात आला. तसेच, त्यांच्या तब्येतीचा आढावा घेऊन त्याचा वैद्यकीय अहवाल न्यायालयात सादर करण्याचा निर्णय घेण्यात आला. यावेळी डीएसकेंची दहा डॉक्टरांनी तपासणी केली.

डीएसके सद्या न्यायालयीन कोठडीत
डीएसके व त्यांच्या पत्नीला दिल्लीतून पुणे पोलिसांनी अटक केल्यानंतर त्यांना पुणे जिल्हा सत्र न्यायालयासमोर हजर करण्यात आले होते. पुणे सत्र न्यायालयाने त्यांना 23 फेब्रुवारीपर्यंत पोलिस कोठडी सुनावली होती. पोलिस कोठडीत रवानगी केल्यानंतर दुसर्‍या दिवशी पहाटेच अचानक पडल्याने डीएसके यांच्या डोक्याला मार लागला होता. त्यानंतर त्यांना ससूनमध्ये दाखल करण्यात आले होते. त्यावेळी त्यांच्या सर्व तपासणी करण्यात आल्या. सर्व रिपोर्ट नॉर्मल असून, अस्वस्थ वाटत असल्याने त्यांना ससूनमध्ये व्हेंटिलेटरवर ठेवण्यात आल्याचे डॉक्टरांनी सांगितले होते. आता पुन्हा त्यांना ससूनमध्येच आणण्यात आले आहे.