डीपी रस्त्यासाठीचे 16 कोटी पाण्यात
पुणे : महापालिकेने विठ्ठलवाडी कमान ते वडगावपर्यंतच्या नदीकाठचा 30 मीटर डीपी रस्ता तयार करण्यासाठी यापूर्वी 12 कोटी 30 लाख रुपये खर्च आला आहेत. आता हाच रस्ता एनजीटीच्या आदेशानुसार काढण्यात येणार आहे. या रस्त्याची खोदाई केल्यानंतर माती उचलण्यासाठी पावणे तीन कोटी रुपये खर्च करण्याचे काम निखिल कन्स्ट्रक्शन यांना देण्यास स्थायी समितीने मंजुरी दिली आहे. त्यामुळे या रस्त्याच्या कामात महापालिकेचे तब्बल 16 कोटी पाण्यात गेले आहेत.
नदीपात्रातील मंगल कार्यालये आणि बांधकामे काढून टाकण्याचे आदेश एनजीटीने दिले आहेत. त्यामुळे हा रस्ताही काढावा लागणार आहे. त्यासाठी पालिकेने या रस्त्याची खोदाई केल्यानंतर माती उचलण्याच्या कामासाठी निविदा मागविल्या होत्या. त्यात निखिल कन्स्ट्रक्शन यांची 2 कोटी 69 लाख रुपयाची निविदा आली होती. ही निविदा 20 टक्कांनी कमी आहे. त्यामुळे स्थायी समितीने त्यांना काम देण्यास मंजुरी दिली आहे, असे स्थायी समितीचे अध्यक्ष मुरलीधर मोहोळ यांनी सांगितले.